香港交通方便，有啲地方真係揸車仲慢過搭地鐵，太古（中國）主席陳南祿（Philip）尋日出席一個環保活動時，就話自己平時嘅活動範圍，主要係中環同埋位於金鐘嘅辦公室，搭地鐵密過好多人，佢仲話：「我張八達通仲殘過你嗰張呀！」說罷即刻喺銀包摷張八達通卡出嚟，張卡甩咗一半色，證明佢真係好環保。
其實，佢尋日出席慈善機構同港鐵合辦嘅環保運動時，已經身體力行，開幕儀式選擇咗喺港鐵中環站舉行，Philip到場時成頭大汗，半邊身都濕晒，狀甚狼狽，仲不時要拎條手巾出嚟抹汗。佢話，佢步行嚟中環，尋日日頭咁好太陽，梗係身水身汗啦。
Philip仲話，環保生活由每一個生活小節做起，譬如平時食飯盡量唔叫太多嘢食，費事食唔晒啦！就算食剩嘢，佢都一定帶返屋企食，唔怪得啲機構搵佢嚟宣傳環保啦。