青少年濫藥情況愈嚟愈嚴重，連日都爆出中學生集體索K事件，連名校生都不能幸免，毒禍蔓延校園嘅勢真係擋都擋唔住。教育局局長孫明揚尋日朝早出席一個電台節目時，聽到傳媒想問毒禍，佢就指指身邊嘅教育局副秘書長葉曾翠卿，自己就極速快閃，好似驚K仔會咬人咁。但佢指派答題嘅葉太就好行貨，結果轉過頭就衰咗。
孫公呢排係焦點人物，臻美辦學權嘅風波、中學教學語言微調政策，甚至學校毒禍都關佢事，所以佢出席親公眾場合，都有大批記者會捧場，希望响佢口撬啲新聞出嚟，尋日佢出席教師中心二十周年慶祝酒會，參加嘅仲有前教統局常秘羅范椒芬，羅太好低調，孫公有官職在身就想低調都難，不過，祝酒之後冇耐，佢哋都高速快閃。
孫公將毒禍嘅波掟咗畀葉曾翠卿，不過，葉太嘅答案真係有等於無，一味耍太極，被問到相繼有學生被發現集體濫藥後，葉太竟然話發覺啲學校喺宣傳、預防工作方面都好用心去做。咁講即係冇問題啦？家長大可高床暖枕少憂啦。
點知，佢朝早講完，下晝已經又爆多三個少女濫藥，睇嚟孫公唔可以聞K遠遁，反而要督促下屬睇緊啲呀！