公民黨近期接連爆出脫黨、離黨嘅爭拗，繼第二梯隊成員季霆剛因不滿參選區會受阻，轉投敵陣民建聯後，前會計界立法會議員譚香文（Mandy）尋日亦正式申請退黨，令有大狀黨之稱嘅公文袋內訌更加熾烈。
公文袋○六年創黨以來，曾經威過一時，企圖取代白鴿黨做泛民嘅龍頭，但○七年區議會同○八年立法會兩次選舉，佢哋嘅藍血貴族形象卻成為包袱，聲勢亦弱咗，好似Mandy咁，打住公文袋旗號，反而輸咗黃大仙區議會議席，○八年立法會選舉，公民袋執委容詠嫦一度走出嚟想同Mandy爭出戰會計界，最終Mandy雖獲公文袋支持，但一樣失咗會計界議席，最慘係，佢落選之後，原本嘅公文袋司庫席位更加被容詠嫦取代埋。同樣落選立法會嘅張超雄亦由副主席貶咗做普通執委，大有人情冷暖、世態炎涼嘅感慨。
所以Mandy最近同張超雄及另一前泛民立法會議員醫學界嘅郭家麒，先後創立名為「關懷香港」同「關懷中國」嘅組織，擺明不滿被冷落，實行另起爐灶闖生天好過。