本文重點
恒基主席「四叔」李兆基囝囝李家誠（Martin）與太太徐子淇上月中迎來第二名千金，十日後就快滿月，Martin尋日透露，次女命名為「李晞兒」，英文名仲諗緊，佢大讚「晞兒」個名好順口，得意又可愛，仲預告太太徐子淇抖完會再追多個添！
東方日報慈善基金與百仁基金尋日舉辦咗個活動，Martin貴為百仁基金委員，出錢又出力，仲請參加活動嘅小朋友食自助餐，大家度過一個快樂的下午。
Martin好開心，話女兒嘅爺爺同大伯（李家傑）都有送禮物畀晞兒，包括細路仔玩具、BB衫等，次女誕生後，就有堪輿學家指晞兒命格旺父親，不過，Martin尋日透露，佢哋並無搵師傅為女兒改名，只係同屋企人一齊傾個名出來：「其實『晞兒』都幾順口吖，改完大女叫晞彤，『晞兒』又順口又得意。」
施榮忻愛女獲派名校
基金副主席施榮忻尋日都好開心，因為其愛女Victoria獲分派到跑馬地聖保祿天主教小學，直屬中學為聖保祿中學，一條龍唔使再頭痛。榮忻大讚間學校好好，而且地理位置好方便；佢家住渣甸山，如果唔塞車，喺屋企五分鐘車程就到學校嘞！