呢批父親尋日出席自由黨發起嘅齊抗金融海嘯大聯盟搞嘅「父親節、快樂Daddy」活動，咪睇佢哋上台時個個笑嘻嘻，但大家講起仔女有冇同佢哋慶祝時，就個個露晒餡。方剛話，仔女唔喺香港，唔係年年都有人同佢慶祝，至於有冇禮物收？佢更打定輸數：「我唔敢期望嘞，冇期望起碼唔會有失望嘛！」

肥仔明對個女廿四孝之至，咁個女又點呢？佢嘅答案同方剛大同小異，個女喺外國讀書，佢都冇人同佢慶祝，只可以回味以前阿女喺間屋收埋啲祝福字句，要佢好似尋寶咁搵出嚟嘅趣事。

橄欖唔知幾時父親節

講到最懵嗰個一定係橄欖，問起佢父親節有乜活動時，佢好坦白咁話：「我聽日有活動！」吓，聽日唔係父親節噃，不過，呢個答案都洩露咗佢暫時冇人預定佢嘅時間嚟慶祝，兼且橄欖連幾時係父親節都未必知呀。

唔知係咪明知呢幾個老竇斯人獨憔悴，富貴黨尋日都整定幾份禮物氹佢哋，方剛抽到支健康飲料，佢講笑話好在唔係「紅牛」；肥仔明就收到張六合彩券，佢話係人生第一張；橄欖抽中個旅行鬚刨，算係最實用，所以佢哋都笑番晒，唔使淒涼咁唱「Lonely……」