回收電腦得把口 地球先生病到嘔

地球先生到底食咗乜嘢垃圾食到咁病呢？鬼咩，依家電子產品咁普及，唔夠三幾個月就換款，製造咗大量電子廢料。原來處理嘅成本非常之高，所以好多地方包括香港在內，索性將呢啲廢料運晒去第三世界國家，關人個關。

問題係，當地人完全冇處理電子廢料嘅知識，搞到釋出唔少有害物質，對地球造成嚴重破壞，地球先生想唔病都幾難。

喺呢個時候，環境局局長邱騰華突然挺身而出要勇救地球先生。原來環保署喺去年三月整咗架「流動回收車」出嚟，用嚟收集舊電腦以及電器，將可以翻新嘅電腦透過慈善團體轉贈畀有需要嘅人士，而翻新唔到嗰啲呢，就會由指定嘅回收商拆件，咁就可以減少污染。

邱騰華呢劑都算係功德無量喎，咁究竟有乜成效？嗱，環保署其實早喺○三年已經推出回收計劃，透過業界以及志願團體回收棄置嘅電腦同配件，喺去年一共回收咗五萬九千幾件，聽落好似都唔少喎。

只不過，知唔知政府估計每年電腦廢料總數有幾多？一百二十萬件呀老友！環保署回收唔到百分之五。而嗰架流動回收車仲失禮，計劃實施咗一年咁耐，收得嗰一千四百幾部舊電腦以及二千七百幾件舊電器，成效有幾高？大家心照啦。

叮佢個鎯鎯，衰咪認囉，環保署仲喺度死撐話，呢個計劃係要提供多種回收途徑以及宣傳教育，所以冇訂下回收數量目標。

嘥氣啦，呢部咁嘅流動回收車之所以拍晒烏蠅，原來全港只係得嗰一千零一部，見到佢喺街出現，真係仲難過中六合彩。

嗱嗱嗱，本報記者就有幸見過一次咁大把，呢架流動回收車仲係泊喺人影都唔多個嘅球場邊，架車空空如也。地球之友高級環保事務主任區詠芷直斥：「環保署推出呢樣嘢都係門面工夫！」

叮佢個鎯鎯，成班環保高官講就天下無敵，做就有心無力，度埋啲「停車熄匙」、「電動車」屎橋出嚟做場騷就當係環保。之但係政府原本喺○五年已經作出《都市固體廢物管理政策大綱》承諾，拖拖拉拉搞咗幾年，先至為膠袋訂立相關法例。

至於電器以及電子產品，喺去年十月嘅施政報告冇錯係再次承諾過進行研究。但環保署發言人話，要今年底至會諮詢業界以及公眾，到真正可以正式立法嘅時候，地球先生可能已經病死咗。

其實，成個香港最污染嘅都市固體廢物，睇怕都係邱騰華。搵日佢肯乖乖自己行入流動回收車，咁就真係做到「保護環境，救救地球」嘞！