本文重點
為咗推動電動車，財爺鬍鬚曾做咗連場爛騷，最新近嗰場就係主持電動車啟動儀式，親身試揸變咗政府車嘅「AM 800」電動車。做完場大龍鳳仲未夠，尋日仲喺個Blog度自吹自擂。
佢話架電動車係政府車輛，所以一定要攞咗政府車牌先可以揸，於是佢喺儀式前一個禮拜就去考牌，仲刻意咁話雖然佢係財爺，但考牌絕冇優待添！考成點大家都知，事關冇牌當日又點試車呢？
跟住佢話揸電動車令人感覺一新，當佢啟動引擎時，並冇一般汽車發出嘅「咔嚓」聲，只要輕輕按下電掣，如果唔係見到Ready字樣，都唔確定架車已被啟動，又話車內完全聽唔到引擎聲，而喺路面都比其他用汽油同柴油嘅車細聲啲，所以日後若果普及，市民要加倍留意路面情況，否則架車駛近都唔知。
唔通預算案亂Sell？
話晒佢有四十年駕駛經驗，使唔使扮晒大鄉里出城咁硬銷呀！但話說回頭，若果佢對電動車真係發現新大陸咁嘅話，咁即係佢根本對電動車冇乜認識，就喺預算案度話引入電動車，咁即係亂咁Sell啦！