長江實業主席「超人」李嘉誠大仔、長實董事總經理兼副主席「小超」李澤鉅，尋日喺加拿大接受加拿大西安大略大學頒授嘅榮譽法學博士學位。佢話得悉獲頒學位後，靜落嚟回想過去二十幾年嚟嘅從商經歷，講到長江集團嘅成功之道，佢話如果試圖講話有單一秘訣，相信大家都以為佢講笑，倒不如提醒大家必須警惕同迴避絆腳石。
小超將要講嘅歸納成三點，第一係唔好自滿以為已成功在握，古語云三人行必有我師，要不停喺良師身上學習乜嘢應該做同唔應該做；第二係唔可以只爭朝夕而唔顧長遠，因為短期嘅盈利，往往會令人沖昏頭腦、趨之若鶩，甚至會前仆後繼。佢話長期投資講求耐心同努力，大部分人唔會樂在其中，競爭自然較少，對長線投資者嚟講，自然較為有利。
最後嗰點係要緊記佢小時候祖父母同父母就誠信、責任感、正直、誠實同誠懇嘅教誨，記住晒呢啲，成功機會就會增加，亦會成為地球村中有名望嘅村民，聲望同財富至會長久。