旅發局主席田北俊尋日透露，五月份整體訪港旅客少咗近一成，其中內地客少咗百分之八。業內人士話，入境遊生意幾乎停頓，導遊帶團量少咗一大截，有啲仲勁減八成；以前一個月帶四、五個團，依家得番一個，唔少人連續十幾日都冇工開。
豬流感疫情愈嚟愈犀利，日本已確診首宗本土感染個案，搭飛機成為「高危」動作。業界擔心，如果情況繼續惡化，好多旅行社都要執笠，超過兩萬個旅遊從業員會失業。酒店業亦好唔得去邊，訂房率同房價比舊年同期至少跌兩成，唔少酒店入住率連五成都冇。
旅遊業成為經濟衰退重災區，呢次比沙士時更加嚴峻。雖然當年情況同依家好相似，但嗰陣冇金融海嘯，世衞取消香港嘅旅遊警告後，旅客來港意欲即時返番嚟。呢次豬流感疫情點發展，至弊連世衞都冇辦法估。
旅遊業仲有排衰，坐等入境旅客數字回升，餓死都未天光。其實，香港背山面海，天然旅遊資源豐富，最啱一家大細去玩。○三年沙士爆發，幾乎搵個入境旅客都難，業界推出本地遊自救，成效唔錯。咦，呢次照辦煮碗咪得囉？
叮！講開本地遊，又係把幾火。嗱，淨係大澳、長洲、南丫島、東平洲等地方，山明水秀，搞個「離島一日遊」，再唔係嚟個「港九新界單車遊」都唔錯㗎。市民有得玩、業界有工開，齊齊Happy，政府好應該大力支持吖。
不過，任何創意去到政府嗰度就死硬。沙士之後，業界推出本地遊，反應不俗，每逢周末，尖沙咀一帶就擠滿等候出發嘅市民，一日閒閒地有近百個團，亦有高官帶埋家人參加，仲讚本地遊大有可為。市民投訴郊野設施唔足夠，政府仲答應盡快改善添。
估唔到原來政府不過係葉公好龍，連三分鐘熱度都冇，事過境遷，乜都唔做。好似大澳咁，話就話要搞「東方威尼斯」咁巴閉，但連防洪工程都要拖到後年至搞掂。舊年一場黑雨，即刻水浸變成孤島澤國，咁搞法，搵鬼去咩。
叮！單車旅遊更加唔好提，淨係連接新界東北同西北單車徑網絡嘅計劃，都畀政府雪藏咗七年。早排為咗「保就業」，又攞番出嚟，可惜，淨係駁幾條單車徑咁簡單嘅工程，最快都要到二○一四年至完成。唉，等得嚟蚊都瞓喇。
政府口口聲聲話旅遊係支柱產業，本地遊已經證明有助旅遊業渡過難關，但過咗六年，連最起碼嘅統籌協調都冇人做，除咗等運到，究竟班官老爺仲可以做啲乜㗎？財政司司長曾俊華前日公布最新經濟數據時嗌晒救命，如果當初由高層官員親自參與，透過跨部門協作，搞好景點，發展本地遊，旅遊業依家使乜望天打卦吖？叮！