行政會議成員楊敏德係知名工業家，大學時一度選修建築系，佢尋日出席一個建築作品展時，透露自己都幾後悔當年因為成日要砌模型而放棄讀建築，改讀純數學，佢仲建議香港嘅中小學生，除咗必修嘅中英數，仲應該讀吓藝術同建築，因為建築物本身就係最大嘅藝術品，集文科、理科同藝術於一身。
本港建築師嚴迅奇尋日舉行建築作品展，海洋公園主席盛智文同楊敏德都有出席，楊敏德話，四十年前已認識嚴迅奇，兩人當時已經好鍾意畫畫，不過就點都唔肯講佢哋係中學、小學定係幼稚園同學。楊敏德仲透露，佢幼時已隨中國第一代女性現代畫家顧青堯學畫畫，近年就跟香港知名抽象派畫家陳餘生，但佢謙稱作品只係塗鴉啫。
