好多高官嘅仔女都喺海外讀書，商務及經濟發展局副局長蘇錦樑（阿Greg）尋日出席一個有關互聯網嘅活動時，透露自己經常同海外讀書嘅仔女以電郵或Chat Room（聊天室）聯繫，不過有時仔女嘅電郵都幾令人傷心，劈頭就問佢攞錢，言下之意係仔女當佢財神咁，現金要速速送到。
佢話仔女畀佢嘅電郵第一句通常係：「Hi！Dad！」第二句就入主題：「need money！（等錢使）」第三句會寫上銀行戶口號碼，佢回心諗吓，三十幾年前自己喺加拿大讀書時，亦係每個禮拜打一次長途電話返香港，好多時又係問屋企人攞錢，原來自己同仔女嘅做法完全冇分別。其實，以前父母仔女仲靠電話聯絡，真人發聲點都好過一封冷冰冰嘅電郵同一行銀行戶口嘅數字。
講番個活動，尋日係世界電訊及資訊社會日，阿Greg話，為咗提升工作效率，最近買咗部Netbook同iPhone，處理文書工作都快咗。不過，家吓互聯網溝通太方便，亦好易行差踏錯，所以佢都語重心長咁呼籲在場青少年，一定要在資訊科技發達同網上不良資訊之間取得平衡，同埋小心墮入網上詐騙陷阱。