旅遊業飽受金融海嘯同豬流感摧殘，業界嗌晒救命，富貴黨近日頻頻出招，先有「肥仔張」張宇人喺立法會要求政府豁免全港旅行社牌費一年，同由政府作出百分百擔保嘅低息甚至免息貸款。尋日又有前黨主席田北俊以旅發局主席身份，喺電台提出同樣要求。佢哋一招接一招，既當旅遊界代表阿Paul謝偉俊冇到，又有省靚富貴黨招牌嘅效果，實在一箭雙鵰。
肥仔張當日喺立法會提出意見時，話明呢個建議係沙士時期嘅措施，當時席上嘅阿Paul聽到都打個突，尋日田少又再發功，同肥仔張好有默契。呢件事如果成功爭取，所有榮譽當然歸富貴黨，可見田少雖然只係普通黨員，政治謀略依然高一籌。
諗番早前田少拍住富貴黨友好去深圳做宣傳嘅安排，可見富貴黨對旅遊界個位仍咬得好緊，大有三年後要一雪前恥，砌低阿Paul奪回議席嘅決心。