立法會兩個委員會訪粵團尋日繼續訪粵行程，港府宣布香港首季經濟收縮百分之七點八後，搞到好多香港人心驚驚，啲議員都唔例外，連日參觀內地鹽田港、機場、物流園同環境園後，幾乎人人都鬧港府不思進取，行事僵化，搞到香港好似被千年冰封咁，樣樣大計都無法落實，行政會議成員劉江華都帶頭鬧埋一份，可見政府團隊都睇唔過眼。
航運物流冇晒優勢
俗語謂山中方一日，世上已千年，即係話物轉星移，你唔郁人哋唔會等你，本港嘅議員訪粵只係兩日，已經對香港嘅航運及物流設施、政策好不滿，人人講起感受都係批香港做嘢太慢，好似自己完全唔係建制一員咁。
劉江華話，深圳嘅海運設施比香港更具競爭力，加上接近貨源，香港面對好大威脅。佢尤其不滿本港嘅物流園講咗七、八年，但到家吓都係得個講，正宗「議而不決」。獲發回鄉證開眼界嘅何俊仁更大數港府不是，佢話香港早就應該向科研方面發展，但係配套不足，支援唔夠，人才更缺乏，唔少香港人只知道急功近利，炒房地產搵快錢，點轉型去高科技呢？佢愈講愈㷫，數埋本港申請專利權要成四十萬元，比起日本同台灣都貴太多，根本鼓勵唔到業界發展科研。
3L嘅林健鋒係廠家之一，佢都認同香港發展物流速度太慢，人才又太唔夠。啲議員人人一嘴，大家嘅共識就係香港喺航運、物流方面已經冇優勢，科技發展又缺乏人才，特區政府仲唔醒醒定定，香港真係有排衰。
豪住酒店唔識熄燈
講完呢啲之後，議員都透露佢哋去到內地變咗大鄉里，前晚佢哋喺深圳東部華僑城茵特拉根酒店享受咗豪華一夜，雖然個個歎完讚不絕口，不過原來大把人係大鄉里，唔識點熄床頭燈，陳偉業同李華明搵極都搵唔到燈掣，惟有用最原始嘅方法，就係搵塊布伸手入燈罩扭鬆個燈膽截斷電源，先至有覺好瞓。