聽日就係愚人節（April Fools' day），預計好多朋友、好多網站都會應節搞吓大整蠱，與其坐以待斃等人玩你，不如主動出擊先發制人！一於「單撈」晒以下介紹嘅玩嘢Apps，睇吓邊個唔好彩中伏先！嗱，玩時玩，跟番傳統玩上晝好喇，玩足全日，老友反面唔好賴我呀！

《Cracked Screen Prank》
屏幕徹底爆晒，睇到都覺得心痛。

《Fake Chat Simulator》
連WhatsApp都可以係假，千祈唔好信到十足。

《Car Damaged Prank》
爆玻璃效果都算唔錯，驟眼睇都幾似中招。

《Cockroach in Phone Prank》
曱甴周圍行，見到都覺得周身痕。

《Prank Pack》內有勁多整人玩意！

《Prank Pack》畫面Hang晒，問你點算？

《Cracked Screen Prank》瞬間爆芒

手機失手墮地爆芒，平則整幾百，貴則唔見幾千銀，聽到都肉赤。錢銀可能事小，冇手機用先頭痕呀！此App就可以畀你嚇人，體驗爆芒感受，可以設定成一掂屏幕即爆，或者隨後幾秒先爆，效果其實幾逼真，應該呃到朋友。

平台：Android

下載費用：免費

《Fake Chat Simulator》假扮對話

顧名思義就係假扮WhatsApp對話內容，用家可以設定聯絡人名稱、上線時間以至對話內容，完美偽造一個WhatsApp對話。至於點樣先玩到目標人物？就睇你創意喇！

平台：Android

下載費用：免費

《Car Damaged Prank》愛車出事

愛車之人就最怕遇到Hit & Run，刮花撞凹冇仇報！《Car Damaged Prank》肯定可以嚇車主朋友一餐，只要上載汽車相片，然後就可以隨時加入凹痕、刮痕、爆玻璃等損毀效果，新車落地的話，見到幅相肯定個心都離一離呀！

平台：Android

下載費用：免費

《Cockroach in Phone Prank》恐怖曱甴

女士們最怕蛇蟲鼠蟻，曱甴更加係佢哋嘅天敵！想嚇佢哋一跳，用呢隻App就掂晒，曱甴好似係機面四圍爬，睇到就覺得好惡心，女士隨時掟機落地逃走！建議搵個安全地方先好玩。

平台：Android

下載費用：免費

《Prank Pack》玩到Hang機

借部手機畀人玩，點知撳兩撳就Hang機壞埋，呢鑊你仲唔賠錢？《Prank Pack》呢隻App真係好過癮，入面有多個整人玩意，當中「Fake Crash」效果最真，玩完幾次小遊戲，畫面就會即時Hang晒，容易引朋友中計，嚇死人！

平台：Android、iOS

下載費用：免費

文：Vincent