集資網站嘅科技產品，近年愈來愈多人關注；當中有無厘頭創作，亦有實用新諗頭，係咪掟錢支持當然考Backers眼光！Kickstarter、Indiegogo等集資網係外國團隊主導，但唔代表香港團隊冇料到，一樣有本地薑靠集資網發圍，以下新品又睇吓值唔值得大家力撐？

Move It網頁指其原價為219美元，現在推出Early Bird優惠，只要119美元而已。

Move It 有四款器材，包括Abs Wheel、Jump Rope、Resistant Band和Push-up Stand，閒置時所有器材可以擺晒落支架，方便收藏。

透過手柄的感應器，可以實時偵測用家運動次數、動作是否正確，實測感應超靈敏。

Aumeo設計輕巧的骰，一隻手掌放得晒；目前其預訂價為129美元。

Aumeo會播放出高、中、低頻聲音，檢測用家左右耳嘅聽力。

左邊設有藍芽開關，而右邊則為開關鍵。

配件會因應用家耳朵靈敏度而調整音樂輸出效果，令播放效果更豐富。

Move It 4月起動

驟眼睇似個怪誕機械人嘅Move It，其實係一件智能健身裝置，內有Abs Wheel、Jump Rope、Resistant Band、Push-up Stand四款健身器材，唔用時可以整整齊齊放上支架方便收藏。特別之處在於內置多個感應器嘅手柄，只要將手柄連接不同健身器材，再同手機App配對，就可以實時記錄運動數據、卡路里消耗等，更可感應出用家動作是否正確，相當靈敏。App內提供一系列Workout畀用家自行訓練，嫌悶的話更可於App內跟朋友比賽，都好互動。最重要當然係Move It係由港人團隊研發，今年4月份就會於Indiegogo集資，想入手就要睇實喇！

網址：http://move-it.club/

Aumeo度耳聽歌

同樣係由香港人研發，Aumeo就已經完成集資過程；於Indiegogo集資金額比目標多五倍，反應熱烈，最近更開始派貨到Backers手上。盒仔設計嘅Aumeo好的骰，用家只要將佢連接耳機，再透過藍芽配對手機並開啟專用App，即可為用家左右耳朵進行獨立聽力檢測，之後Aumeo就會儲存用家對聲音頻率的靈敏度並製作用家嘅設定檔，十足一個專業級EQ裝置。再將Aumeo連接手機、電腦等裝置，開啟Aumeo，即可聽到調整後嘅音樂，毋須於裝置內再搞任何設定。雖然Aumeo已經完成集資，不過在正式量產期間，大家仍可以預訂。

網址：http://aumeoaudio.com/pre-order-aumeo/

文/攝（部分）：Vincent