為咗緩震，各大運動品牌可謂無所不用其極，近年嚟就以全新泡綿配方成為王道，PUMA去年推出嘅Ignite跑鞋，泡綿中底有齊緩震、回彈與輕量化三大優點，即時成為品牌嘅旗艦級跑鞋系列。今年PUMA再接再厲，早前推出咗新一代Ignite V2，最近又有威力加強版Ignite Ultimate，加上Speed 600都加入Ignite系列，實行多線出擊，為各位跑步達人送上多層次嘅緩震表現。

Ignite Ultimate $999/對

整塊EVA鞋墊用上壓模式設計，表面布滿立體Pattern，鞋尾又加上防滑膠條，預防腳掌喺鞋籠內過度移位。

踭位嘅中底厚度接近40mm，緩震能力非同凡響。

鞋面用上全新嘅三層式構造，唔只透氣，仲有更大嘅延伸度。

鞋踭設有Heel Counter，有助穩定腳踭。

外底嘅黑色部分係耐磨度高嘅Evertrack物料，練長課無後顧之憂。

Speed 600 Ignite $849/對

前掌採用動力推進區布局，轉彎時有助將能量引導向前。

留意鞋舌、鞋帶、鞋側連成一氣嘅EverFit+，鞋帶與鞋側之間用索帶連結，加強韌力。

後掌中底加上薄身Ignite，緩震能力當然優勝過以往嘅Faas系列。

Ignite Ultimate 緩震Power Up

與年初嘅Ignite V2相比，好明顯Ignite Ultimate嘅Ignite泡綿中底加厚咗，踭位厚度接近40mm，緩震與回彈表現都係同系最強，仲要留意中底兩側都有凸出嘅箭嘴圖案，除咗喺外觀上營造速度感，最重要係呢種立體設計可以帶嚟額外嘅支撐作用，令變厚咗嘅泡綿唔會喺受壓後「一沉不起」。鞋身方面屬於全新嘅三層構造，外層係透氣網布、中層係支撐骨架、底層嘅內裡做到貼腳、柔軟。Ignite V2與Ignite Ultimate，筆者兩款都着過，Ignite Ultimate除咗緩震更強，全新嘅鞋面構造更柔軟、更有延伸性，尤其是Ignite V2前掌稍窄、夾腳嘅問題，都冇再喺Ignite Ultimate身上出現，當堂舒服晒。不過留意因為中底變厚，反應點都會有所影響，想快？Ignite Ultimate未必係最好選擇，不過作為耐力鍛煉嘅長課拍檔，或者係比賽後嘅Recovery Run，Ignite Ultimate都勝任有餘。除此之外，Ignite Ultimate嘅前後掌落差都幾明顯，所以較為適合後掌落地嘅跑手需要。

Speed 600 Ignite 進階之選

對於進階跑手而言，緩震要求未必去到Ignite Ultimate咁高，反而需要多啲路面反應，藉此提升速度感嘅話，大可改選Speed 600 Ignite。鞋底方面冇Ignite Ultimate咁厚，而Ignite泡綿只係用喺後掌位置，蹬地時嘅反應自然實在得多；前掌外底採用動力推進區布局，有助加快離地速度之餘，特別嘅綞形設計，轉彎時可以將能量引導向前，特別適合喺運動場上嘅繞圈訓練。至於鞋身設計亦大有心思，兩側嘅中足位置設有EverFit+裝置，結合咗鞋舌、鞋側與鞋帶，藉此加強中足嘅支撐度，讓跑手可以放心加速。

文︰Dick　

攝︰Homan