Kyocera Urbano V02睇得又打得

早前日牌Kyocera（京瓷）有部外形粗獷到爆嘅Torque G02手機，全方位防護，似乎好啱戶外用，不過有人嫌佢太大部，厚身得滯，唔夠靚仔。日廠出名細心，其實佢哋仲有部Urbano V02，外觀似足傳統日系手機咁靚仔，機身厚度只有8.2mm，防水防塵外，更支援MIL-STD-810G美國軍事防護標準，既好樣，又硬淨！

Kyocera Urbano V02 $3,980

用5吋屏幕，兼且換上實體功能鍵。

機背大大幅金屬，手感冰涼。

採用nanoSIM及支援microSD，香港4G都用到！

附送充電底座，惟充電時手機畫面唔會轉為大時鐘，美中不足。

傳統直向功能表，右欄提供分類，搵Apps夠直接。

內置《Daily Step》，計算用家每日步行的步數。

備有Eco Mode，提高電量續航力。

提供多款主頁介面，包括極大圖示嘅Entry Home，啱老人家。

經軍事防護測試

同傳統日系手機相似，V02機身線條簡約行先，機身僅厚8.2mm、重138g，有個5吋芒，都好揸手。配色更加有驚喜，大路黑白銀灰統統唔見，取而代之係Mocha Black、Twinkle Pink及Deep Green；而且機背用上有髮絲紋嘅金屬，質感細緻。貴為日本手機，V02當然支援IPX5/IPX8防水及IP5X防塵標準，而且仲通過咗六項MIL-STD-810G美國軍事防護測試，包括高空跌落、震動、高溫操作、高溫保管、低溫操作、低溫保管；屏幕亦換上Dragontrail X高強度玻璃，肯定夠耐用。

屏幕震動傳話音

身處戶外環境，汗水、雨水少不免殘留於屏幕聽筒上，所以V02改用Smart Sonic Receiver，即是機身不設傳統聽筒，係透過屏幕震動，將聲音傳送到耳朵。實測通話質素依舊清晰，反而係要適應聽電話嘅位置。硬件方面，V02搭載四核心處理器及2GB RAM，屬中階效能，運行Android 5.1系統都見暢順。值得一讚係附送充電底座，毋須拆開機頂防水蓋即可充電，確係方便。