去年Nike Running主打Zoom Air，今年似乎輪到Lunarlon發威，渣馬之前推出咗LunarTempo 2，最近就有LunarEpic Flyknit接棒。話說Nike喺2008年首推Lunarlon技術，靈感來自太空人登月時嘅「跳跳虎」步伐，標榜輕量化、緩震與回彈兼備；LunarEpic Flyknit透過全新設計嘅中底物料與外底紋理，提升以上功能之餘，而且破天荒用上中高筒鞋領剪裁，令跑手嘅每一步都覺得更流暢，就好似當年嘅Neil Alden Armstrong唔受重力束縛，輕鬆踏步。

Nike LunarEpic Flyknit

LunarEpic Flyknit（W） $1,399

LunarEpic Flyknit（M） $1,399

針對腳掌唔同位置對支撐力與透氣嘅不同需要，Flyknit鞋面嘅編織密度亦有所不同。

鞋身兩側藏有Flywire，以最輕巧嘅方式帶來最可靠嘅支撐力。

主要嘅落地位置設計成活塞形布局，內裏嘅輻射形紋理有助分散壓力。

鞋墊備有厚薄兩款選擇，不過既然Lunarlon中底緩震力高，個人認為薄墊（下）已經好夠用。

中底兩側都有橫向式坑紋，將落地時嘅能量引導向前。

LunarEpic Flyknit嘅鞋底用上兩種唔同密度嘅泡棉材料製成，而且以熱熔方式無縫結合，令用家更直接Feel到緩震效果。

熱熔精製泡棉鞋底

不經不覺，Lunarlon面世接近八年，由第一代嘅LunarRacer，以至之後嘅LunarGlide及Flyknit Lunar，筆者都着過，喺緩震與回彈方面的確有好高平衡度，咁完美，仲有得改？LunarEpic Flyknit嘅設計師TaeYong Lee恍如食神上身，以估你唔到嘅方法提升Lunarlon嘅功能，就係擺脫泡棉中底加上耐磨橡膠外底呢種傳統做法，改為以柔軟嘅IP泡棉作為中底核心，再喺外面包上質地稍硬嘅IU泡棉，而且兩者之間唔用膠水，改用熱熔方式無縫整合，配合中底兩側嘅橫向式坑紋，藉此提升緩震與回彈效果之餘，仲可以將腳掌落地時嘅能量，更有效引導向前，成為提腿時嘅助力。除此之外，外底採用前四後一嘅活塞形布局，正正係最易掂地嘅位置，而每個活塞都以雷射方式切割成輻射形紋理，藉此分散落地時嘅壓力。

Magista鞋筒變奏

鞋底大革新之餘，LunarEpic Flyknit仲係剔牌首款中高筒跑鞋，設計靈感來自2014年面世嘅波Boot Magista，令鎖定效果由腳踭向上延伸到足踝與小腿，而且將呢三個位置的動作協調起嚟，令落地至提腿嘅過程變得更流暢。至於Flyknit鞋面固然有輕量化、貼腳與透氣度高等特色優點，而且鞋身兩側植入咗Flywire，後者與鞋帶連結，索緊鞋帶後，既可加強支撐作用，又保持輕量化特色；就連鞋帶款式都值得畀Like，因為LunarEpic Flyknit不設鞋舌，鞋面又薄，如果選用粗身或者圓形鞋帶，索緊後會對腳背構成壓力，LunarEpic Flyknit就用咗扁身鞋帶消除以上問題，聰明！

查詢：2174 6938（銅鑼灣加寧街2號Nike Running Experience Store）

文︰Dick　

攝︰Homan