有啖好食！Grab & Go

做記者食無定時，經常啃個麵包就一餐，其實我都好想舒舒服服坐低食餐正經飯，只是生活實在太匆忙！不過邊行邊食未必冇好嘢，最近我就發現Just About Food新推出了正宗瑞士薯餅；韓式快餐店Kim's Bowl則有逾140種配料任揀的5色營養飯盒，同樣美味富特色，即使買外賣都有啖好食。

瑞士薯餅配番茄、馬蘇里拉芝士 $34
香濃瑞士薯餅加上新鮮清爽的番茄，配以軟滑馬蘇里拉芝士和甜味較濃縮的日曬乾番茄，正好中和薯餅的油膩感。

焗芝士瑞士薯餅配炒蛋 $34
早餐食炒蛋至啱！用上Gruyere芝士配上富粒粒口感的薯餅和滑溜炒蛋，趁熱辣辣食，特別滿足！

番茄汁珍寶意式肉丸（左）、黑森林野菌汁珍寶意式肉丸（右）各$28
珍寶肉丸較平常肉丸大3倍，一啖鯨吞或慢慢嗒各有過癮滋味，配上Creamy濃郁的黑森林野菌汁或是酸甜開胃的番茄汁，食味各有特色。

焦糖菠蘿．雜莓窩夫 $35（小）、$58（大）
窩夫不計成本，用上德國麵粉和100%牛奶製作粉漿，令成品更加香濃，兼外脆內軟；配以爽甜的焦糖菠蘿、藍莓及士多啤梨，是下午茶最佳甜點。

外賣店位處機場快綫香港站登機大堂樓層，是附近上班族及遊客在匆忙時也能品嘗到美食的方便之選。

雜菜牛肉泡菜炒飯 $48
配菜包括翠肉瓜、冬菇、甘筍絲、大豆芽及菠菜，加上太陽蛋和以韓式醬料醃過的牛肉，有齊均衡的5色營養，加埋惹味泡菜炒飯，夠晒豐富。

豆腐冬菇雜菜沙律 $40
素食者之選，用上以韓國配方、香港製造的純豆腐，入口嫩滑清新。節食人士選配沙律作主食，吃得輕盈。

炸雞可樂杯 $32
特別為懶人而設，方便匆忙的客人邊行邊飲邊食。炸雞口感脆嫩，醬汁香甜醒胃。

魚蛋串 $15（左）、香辣炒年糕 $20（右）
地道韓式小食。魚蛋串由韓國直接輸入，有近17cm長的魚蛋，分量十足，豬骨湯加入了蒜頭、白蘿蔔、大葱等，十分香口；香辣炒年糕則用上以韓國大米製的一口年糕及自家調配的韓式辣醬，煙韌不飽滯。

主食有白飯、泡菜炒飯、粉絲（紅薯粉絲）或雜菜沙律供選擇，加上7選1配菜和5選1醬料，配搭逾140種。

店子主打外賣韓式輕食，但亦有少量堂食座位供客人坐低歎。

Just About Food足料瑞士薯餅

在香港少有供應正宗瑞士薯餅Rösti的地方，這種源於瑞士伯恩的美食，是當地農民常吃的早點，更是瑞士人眼中的國民食品。位於香港站的外賣專門店Just About Food早前就找來瑞士籍大廚設計食譜，自家製作Rösti。有別於用薯粒製成的薯餅，先將新鮮薯仔切絲，再混入薯蓉製成薯餅，既有薯蓉的滑溜，亦富薯絲的咬口，口感層次分明；大廚又特別加入豆蔻粉，誘發出淡淡香味，提升味道。配上各式醬汁和配料，如炒蛋、番茄、馬蘇里拉芝士等，即成濃郁歐陸滋味，夠晒飽肚。另外，外賣店同時引入如高爾夫球般大小、比平常意式肉丸大3倍的珍寶意式肉丸，以及用上德國進口麵粉製成的香脆窩夫、新鮮三色沙律等。前者大大粒啖啖肉，配上以牛肝菌、鮮白菌等自家調成的黑森林野菌汁，零舍Creamy。

Shop Info：Just About Food

地址：中環香港站預辦登機大堂HOK 55號舖

電話：2178 4728

Kim's Bowl自選配搭韓式飯盒

位於荃灣綠楊坊的Kim's Bowl，主打逾140種配搭的自選韓式飯盒。自選配搭以「Wi-Arae」（韓文「上和下」）為概念，以三部曲分層選擇：先從配菜中7選1，再來是主食4選1，最後是醬料5選1，配搭出最合個人口味的韓式滋味。配菜中最傳統的雜菜牛肉，包括翠肉瓜、冬菇、甘筍絲等輕盈蔬菜，再配以太陽蛋和韓式牛肉，有齊黑、白、黃、紅、綠5色營養，符合健康主義，帶出快餐都可以食得有營的理念。店方見愈來愈多人吃素，配菜中亦有一款豆腐冬菇，用上以韓國配方炮製的純豆腐，入口嫩滑清新，建議配沙律，吃得更輕盈。最後選醬料，如柚子醋、辣椒醬、燒烤醬、蜜糖芥末醬或焙煎芝麻醬，甜酸辣鹹任君選擇，為味蕾帶來刺激。除自選飯盒外，店子亦有韓式地道小食，如魚蛋串和炸雞可樂杯等，充滿韓國特色。不過提提大家，以上食物均需製作數分鐘，若然超趕時間，不妨選購每日新鮮製作的紫菜飯卷或韓式前菜一樣可醫肚。