螞蟻兵團合製酒店級美食

身形細小的螞蟻毫不起眼，但總喜歡聯群結隊出動搵食，聲勢浩大甚至有「蟻多摟死象」的本事。最近一口氣在尖沙咀及荃灣開店的「小蟻人」就以團隊精神作賣點，幾位星級酒店出身的大廚齊齊施展渾身解數，嚴選優質食材炮製料理，期望在競爭激烈的餐飲市場殺出重圍。

煙三文魚蟹肉墨魚汁意粉 $98
嚴選銅模意大利粉製作，此種手工意粉質感粗糙並散發濃郁小麥香氣，由於坑紋較深，因此分外掛汁，配搭蟹鉗肉及煙三文魚鮮味十足，淋上墨魚汁，並以帕爾馬芝士調味，層次感豐富。

烤黑醋羊鞍架配粟米餅 $168
羊鞍用意大利黑醋、迷迭香等香草醃製24小時，入味後放入焗爐烤至7成熟，肉質保持鬆軟嫩滑，再以外脆內軟的傳統意式粟米蓉餅作配菜，既香口又可辟走羶味。

炭燒美國極黑豬鞍扒 $128
全天然飼養的美國極黑豬，惹味又彈性十足，脂肪豐潤近乎入口即溶，厚切並炭燒至7成熟，再灑上香草及海鹽調味，最能呈現其原汁原味。

藜麥西柚青瓜沙律未定價
餐廳對食材有嚴格要求，近年備受追捧的藜麥當然也有機會品嘗得到。用西柚和青瓜等清爽配菜製成沙律，帶來清新滋味之餘，亦營養豐富。

馬卡龍草莓撻 $70
用鮮牛油製作的酥皮撻鬆脆香口，配搭香草、杧果、抹茶、焦糖及士多啤梨5款自家製馬卡龍，與吉士忌廉同吃，甜而不膩，賣相亦很吸引。

綠茶窩夫配Mövenpick雪糕 $68
甜品的用料同樣一絲不苟，好像製作窩夫的綠茶粉就專程從日本宇治入貨，味道香濃並帶有回甘，烘焗成香脆窩夫，配雲呢拿Mövenpick雪糕滋味無窮。

杧果拿破崙 $68
甜品大廚的拿手傑作，酥皮用新西蘭Anchor淡牛油人手搓製而成，摺足100層，口感脆薄，牛油味香濃而不油膩，除了杧果外，亦有士多啤梨、焦糖香蕉或雜果3款口味。

餐廳地方寬敞，裝修亦算雅致，是難得讓客人坐得舒適的甜品店。

既是西餐廳，又是甜品店，厚厚的餐牌帶來包羅萬有的選擇，卻反而令人擔心兩頭唔到岸。直至侍應把美國極黑豬鞍扒、墨魚汁意粉，還有草莓心太軟、杧果拿破崙等菜式甜品逐一端上桌，精緻賣相令人信心大增，試吃之後雖未至於驚為天人，卻稱得上是高水準之作。

酒店名廚齊打天下

好奇心驅使下決定要跟大廚傾兩句，才發現負責西餐的Mike與甜品總廚Andy均大有來頭。原來兩人已入行20、30年，曾於半島酒店、遊艇會、郵輪等5星級酒店及高級會所掌廚，正所謂樹大好遮蔭，決定轉到名不見經傳的新餐廳工作，全因為「團結」兩個字。「我哋同老闆共事多年，近年佢自立門戶開設連鎖米線餐廳都做得有聲有色，而『小蟻人』更用了兩年時間籌備，設立了中央工場還有培訓中心，睇得出老闆誠意十足，就決定一齊過檔打天下。」

重視品質嚴選食材

幕後班底都出身自星級餐廳，廚藝毋庸置疑之餘，對食材也有極高要求，以扒類為例，牛肉是安格斯頂級肉眼和西冷，豬肉則是獲獎無數的美國極黑豬；Risotto就選用意大利名牌Scott有機米混合La Rustichella黑松露醬及新鮮黑松露菌調製而成，特別香濃滋味，就連看似平平無奇的意大利粉也採用Rustichella d’ Abruzzo這個著名品牌的銅模意大利粉製作，表面粗糙的坑紋分外掛汁，口感比普通意粉彈牙得多。甜品同樣是主打，既有大路的中式糖水與豆腐花，色香味兼備的西式甜品更值得一試，尤其招牌士多啤梨心太軟就用了法國Valrhona 35%白朱古力與Mövenpick雪糕，而杧果拿破崙的酥皮同屬自家出品，摺出100層鬆脆滋味令人一試難忘。