正所謂壓迫愈大、反彈愈大……我講緊波鞋設計呀，正如牛頓第三運動定律所言︰「當兩個物體互相作用時，彼此施加於對方的力量，其大小相等、方向相反」，呢個原理，喺唔少跑鞋及籃球鞋身上得到體現，而adidas嘅「刀片跑鞋」Springblade就名副其實走得更「前」，將力量有序地向前傳送，令跑手更放膽向前邁步。

初心之選
Springblade E-Force $1,299

鞋身中段內外兩側用上唔同設計，支撐力與穩定性並重。

為咗令跑手容易適應，故此鞋底前掌用番「實心」設計。

高手升呢
Springblade Solyce $1,599

鞋身兩側各有兩條索帶，全程幫你撐住腳掌。

鞋領內籠設有厚厚嘅墊位，舒舒服服緊貼足踝。

薄身鞋面加上無縫設計，明顯為咗輕量化而設。

女生專屬
Springblade Nanaya $1,599

鞋身多個位置都有Powerband，多向發揮支撐作用。

有跑無類 雙版本鞋底

高質素嘅跑鞋當然要緩震與回彈力兼備，不過諗深一層，無論從用料或者結構考慮，主流鞋款嘅作用力與反作用力嘅傳遞過程，都係傾向縱向式，Springblade嘅刀片式鞋底，就將回彈時嘅力量改為前導式；簡單嚟講，觸地時，鞋底嘅刀片形組件喺受壓下就會彎曲，從而發揮緩震作用，由於「刀片」係用高彈性物料製成，故此隨即就會回復原狀，而所有「刀片」嘅形狀都係向前傾斜，所以喺呢個過程之中，回彈力並非單純向上，而係向前傳送。

至於最近上架嘅Springblade Solyce，原來係Springblade嘅第三代產物，鞋底沿用刀片結構，最大分別係與地面嘅接觸點，由用料到表面紋理都加強咗耐磨效果。此外，細數之下，雖然鞋底中段比第一與第二代少咗一對刀片，但係緩震與回彈表現依然咁高，筆者試着過後，感覺就似坦克嘅履帶運作，前導助力相當明顯，甚至會令人愈跑愈快。不過正如第一與第二代Springblade，Springblade Solyce嘅整個鞋底都係刀片形結構，對於初試刀片鞋嘅用家而言，或者會覺得轉向困難，所以同步另有Springblade E-Force上架，鞋底前段改用傳統嘅「實心」設計，令用家容易適應。無論你之前有冇接觸過刀片跑鞋，只要你愛跑步，第三代Springblage都可以放膽試。

全線用盡 索帶設計

無論係Springblade Solyce或Springblade E-Force，鞋身結構嘅改動更加明顯，前者唔只比第二代更輕、更薄，而且支撐力更高，因為鞋身左右各有兩條高彈力嘅索帶，由鞋帶區連接到鞋底，故此由觸地到提腿嘅整個動作變化，鞋身都可以緊貼腳掌，尤其是後面嘅索帶向踭位延伸，配合鞋領內籠有厚厚嘅墊位，緊緊撐住腳踭，而且比傳統嘅外罩式設計輕巧。

至於Springblade E-Force嘅鞋身以透氣網布為主，而中段內側有合成皮革包覆，外側就有一條索帶，踭位沿用主流嘅罩形設計，雖然未似Springblade Solyce玩到咁盡，但正如佢嘅前掌鞋底設計一樣，可以令初次接觸刀片跑鞋嘅用家更易適應。同步開售嘅Springblade Nanaya，就將索帶設計推向極致，整片鞋底都係刀片式設計，而類似織物結構嘅鞋身，着上腳似着襪多過着鞋，貼腳、自然、輕巧，最大特色係鞋帶區前段及鞋尾都有一條橫向式嘅Powerband索帶，而鞋帶區中央再有交叉式嘅Powerband，故此鞋身再輕再薄，都唔會有兩頭擺、唔穩陣嘅不安全感覺，可惜……Springblade Nanaya只有女裝，男生冇份，睇嚟第三代Springblade有啲偏心喎！

查詢︰2730 0157（尖沙咀漢口道17號adidas旗艦店）

文︰Dick

攝︰Chun