西班牙直擊首設Dual Pixel機王S7夜拍勝對家

每年春季，手機迷目光均聚焦在西班牙，因為Samsung例必在此舉行年度旗艦機Unpacked發布會。今年小記有幸到巴塞隆拿CCIB會場直擊兩部Galaxy新機S7及S7 edge面世，雖然外形驚喜不大，但就首度加入Dual Pixel技術，影相滑溜過iPhone 6s Plus；加上有IP68防水及記憶卡槽，跑分又創新高，擺明係機王規格，難怪連Facebook教主Mark Zuckerberg都站台力撐！

S7（左）及S7 edge（右）將於3月中上市，預計售價在六千港元左右。

S7（右）及S7 edge（左）分別配備5.1吋和5.5吋屏幕，解像度維持在2K級數。

保留鏡面機身，驚喜不大，最大分別是鏡頭由凸變平，改善手感。

具備Always-On Display，屏幕可在休眠時顯示時間、日曆及不同待機圖案。

S7首度支援Dual Pixel技術，夜拍比iPhone 6s Plus更明亮細緻。

終於肯加入microSD卡槽，邊緣位仲做足防水保護！

新加入Game Launcher，可在遊戲途中擷圖和錄影，方便分享戰績！

此乃Motion Panorama，可以將全景相變成Live Photos，捽住改變視點，過癮！

《AnTuTu》跑分高達124,166分，奪冠是常識吧！

主舞台破天荒採用四面台設計，入場如睇Show一樣！

Facebook創辦人Mark Zuckerberg現身力撐，仲即場介紹將來的fb 360功能。不過無咩人理佢講乜，皆因個個爭住影佢相「集郵」。

Gear 360似足Webcam，它前後都有鏡魚眼頭，可以拍360°全景。

可與Samsung手機同步，實時預覽VR效果。

記招變開Show

小記入行多年，Unpacked記招留下不少腳毛，但今次S7發布會依然叫人眼界大開。其他不說，單是主舞台採用四面台設計，記招猶如睇騷，極之罕有；發布會途中還加插VR宣傳片環節，人人頭戴同廠Gear VR睇住S7飛過，場面震撼！說到新機，老實講是失望的，因為玻璃及金屬物料，底面2.5D弧形玻璃修飾，靚歸靚，但沿用舊設計，實在有偷懶之嫌。幸好拿上手會發覺機身比以往圓潤，加上鏡頭由凸變平，無咁刮手，手感改善不少。美中不足是指模問題依然頗嚴重，小記要邊影邊抹，好困擾！

側屏效用大增

S7及S7 edge分別備有5.1吋和5.5吋屏幕，維持用2K解像度及Super AMOLED材質，輸出鮮艷奪目。另外屏幕追加Always-On Display功能，毋須喚醒屏幕，便能顯示時間、日曆及待機圖案，實用又省電！edge系列的兩邊側屏經常被批評作用不大，今次S7 edge的Edge UX捷徑列明顯加闊，睇同撥都更加方便，而且增多了即時新聞、指南針及球賽結果等工具選擇，側屏優勢得以發揮！S7及S7 edge分別內置Exynos 8890及Snapdragon 820處理器，同樣搭載4GB RAM，撥頁、開Apps流暢，S7 edge跑分更錄得超誇張的124,166分，拋離第二位兩萬多分，效能之高可見一斑！顏色方面，有金、白、銀、黑四款，個人覺得黑色最靚！

追加記憶卡槽

鏡頭是今代最大賣點，雖然主鏡頭稍稍降至1,200萬像素，但就換來F1.7大光圈，配合新加入的Dual Pixel技術，雙像素下吸光量比上代大增95%，廠方拿iPhone 6s Plus夜拍相比較，聞相下S7就明顯更清更銳利。S7的拍攝介面無大改變，不過對焦明顯比上代爽快，並追加Motion Panorama功能，將全景相變成動態Live Photos，仲可邊捽邊改變視點，勁好玩！特別一提，S7系列一改「孤寒」作風，終於加入microSD卡插槽，同時電量大幅增至3,000mAh及3,600mAh，加上IP68防水防塵設計，你想得到的功能它都有齊。