杯緣子最近因為草弓剪剛真人扮演而在香港大熱，很多人四出搜購，有一位朋友中了毒，很喜歡，經常問我各種關於杯緣子的問題，由款式到價錢，一天問好幾次，但最後，竟然一隻也沒入手，我問為甚麼，他竟然說，因為無儲開，所以唔儲了。

不是不喜歡，不是不想買，但就是因為無儲開，所以唔儲。我忽然記起，之前他也曾經問過我關於Hot Toys 12吋人偶、美劇《Walking Dead》、《閃電俠》以至《復仇者》等等問題，但最後他的答案都大同小異……

無睇開所以唔睇了，無追開所以唔追了，無玩開所以唔玩了，無儲開所以都係唔儲了……面對這些豬兜，我都想問一句，你一出世都冇食開奶，冇食開點解你又食？你返工出糧之前都冇出開，咁你又出？

如果你唔會因為個女仔你冇追開所以唔追，咁點解一套好睇又值得追嘅劇或者漫畫你會話無追開所以唔追？好多你去旅行嘅國家你都冇去過，咁點解你又敢去？好多嘢你都冇食過冇試過，點解你又肯試？「無×開所以唔×了」，說到尾就是害怕改變的懶蟲與廢柴的思維模式，看似有點道理，實際上卻只是廢話、廢話和廢話。因為很廢所以要說三次。你呀，可以直接說因為害怕儲這玩意是無底洞會花你很多錢所以還是不要了，你也可以說你害怕追完這套劇或者漫畫會很失落所以寧願不開始，至少你有用腦，至少你還算誠實……

但就是不要再用「無×開所以唔×了」來忽悠，自欺欺人了好嗎？