玩厭了城市槍戰？《Far Cry Primal》絕對畀到大家耳目一新的感覺，因為今集遊戲將戰場推前到中石器時代，大家要面對長毛象同劍齒虎等猛獸，但手上的武器卻只是自製長矛同弓箭，牌面睇輸硬，好在玩家有能力馴服其他猛獸幫手，玩法真係同其他射擊遊戲有好大分別！

以咁原始的自製武器，可否馴服到猛獸，進佔食物鏈的最高層呢？

遊戲內主要分為三個部落，每個都有獨特語言，製作認真。

用長矛點樣可以擊退體形相差幾十個碼的巨大長毛象？

馴服野狼比較容易，三兩下手腳就能令牠跟你一同去打獵。

只要馴服了猛獸，就可差遣牠們協助狩獵。

超廣闊開放式地圖

《Far Cry》系列向來都以蠻荒世界作為遊戲背景，今次有少少外傳性質的《Far Cry Primal》就玩得更盡，將場景設定在一萬年前，即中石器時代的「歐羅斯」大陸。開發小組話這個開放式地圖有《Far Cry 4》時咁大，提供好多可能性。遊戲係講玩家所屬的狩獵族群被其他族群攻擊卻得以幸存，之後要學識點樣用火、用野獸骨頭製成武器及工具，既要抵禦當時統治世界的猛獸，另一方面又要抵擋其他部族的攻擊或反攻敵人部落，原來一萬年前的生活都不易過。當期時人類並未處於食物鏈最頂端，一不小心就會成為其他猛獸的點心，遊戲重心就係要在受大自然威脅下，將知識及技術結合令自己往上爬。

馴服猛獸陪出征

巨大長毛象同劍齒虎在遊戲場景裏橫行，玩家只可以用原始工具及武器，要避開牠們的長牙、利爪攻擊絕非易事。幸而人類身形雖輸蝕，但就懂得用腦，要在巨大的開放式世界「歐羅斯」上不斷採集資源，靠狩獵小型動物以取得毛皮及骨頭製造不同道具，甚至乎可以馴服各種野獸作為自己的好幫手，例如遊戲初期比較容易馴服野狼，帶牠一同外出狩獵就可以獵得較大型的動物；另外亦可馴服貓頭鷹進行高空攻擊，又可差遣獵豹突襲或指使巨熊強攻，玩法變化多端。

創製石器時代語言

本作的各款野獸外形和動作都做得非常像真，要成功狩獵或馴服牠們，真係要做吓功課先得。而各部落人類的設定亦沒有馬虎，遊戲存在着三個彼此敵對的部落，開發公司特別跟語言學家合作，創造出三種能夠呈現出石器時代特徵的獨特語言；雖然玩家都應該要睇字幕先明白對話內容，但都可見製作上有多認真！值得一提，《Far Cry Primal》會同步推出繁體中文版，一方面可感受動態擷取演員同配音員努力苦練的「石器時代」語言外，亦較容易明白故事情節。

INFO

類型：動作冒險

開發：Ubisoft

平台：PS4、Xbox One

推出日期：今天

售價：$398

網址：www.ubisoft.com.hk/FCPrimal/

文：Brian