朝聖新地標 Jordan 8 Wellington
咪怪我又抽水，有好多人話凡事要北望神州先係王道，見仁見智啦，至少全亞洲最大間嘅Jordan Brand旗艦店，唔係落戶深圳河以北，而係香港嘅中環。呢間叫做「Jordan 8 Wellington」嘅新舖有幾巴閉？唔只地方大、款式多，仲有既窩心又互動性高嘅專屬服務「Jordan Brand Services」，淨係計「Detail My Jordans」呢項破天荒嘅清潔服務，已經贏盡鞋迷嘅歡心，喺香港做AJ粉絲，我好自豪囉！
營業面積約4,000平方呎，令新舖成為亞洲最大嘅Jordan Brand旗艦店。
位於威靈頓街嘅Jordan 8 Wellington，門口上面嘅大型金色Jumpman標誌，成為中環新地標。
由Michael Lau創作嘅巨型Jumpman立體裝置，係由多個Jumpman Figure組成，每個表面都用上金色電鍍處理，絕對Eye Catching！
聖鬥士有嘆息之牆，Jordan 8 Wellington都唔輸蝕，大門口就有歷代AJ合成嘅AJ之牆。
由地板到柱上都有形形色色嘅專屬Logo，好似呢個入球路線圖，出處就係Michael Jordan喺98年Finals嘅Last Shot。
由地板到柱上都有形形色色嘅專屬Logo，好似呢個入球路線圖，出處就係Michael Jordan喺98年Finals嘅Last Shot。
ordan Brand Services仲包括Customisation訂製服務，Jordan.com會員可以為籃球Tee與組隊波衫，自組人名、號碼與心水Logo。
Footwear Trail嘅客戶可以跟從片段中嘅動作示範，實際試出所選鞋款是否適合個人嘅實際需要。
專為新店而設嘅Jordan Brand Services，備有多項互動服務，包括讓球迷提升球技嘅Jordan Flight Camp。
要數最新、人氣最高嘅Hot Item，當然係啱啱上架嘅AJ XXX（$1,699）。
由AJ 11演變而成嘅Jordan Horizon Premium，鞋面改用織物結構，更顯時尚風，售價$1,499。
AJ I已經升格為永垂不朽嘅潮流神物，新舖又點可以冇？呢款黑白色AJ I（$1,299）就夠晒易襯衫。
Icon Tee係Jordan 8 Wellington嘅獨有新品，售價$249。
唔使問阿貴，Detail My Jordans一定有大把鞋迷排隊，想試試就要盡早預約了！
洗鞋揀鞋再打波 窩心又全面
依家抽對AJ難過登天，一旦畀你抽中，往往又唔捨得着出街，揩花少少整污糟，心痛到呢，中環新店嘅Detail My Jordans服務，就可以幫大家解開心結。只要你係Jordan.com嘅會員、又事先預約咗，兼且你對AJ嘅製造年份喺最近三年之內（鞋籠Tag牌嘅左上角有寫），就可以免費享用呢項服務，新店安排咗專業人員及工具，幫你對AJ洗白白重現神采，夠窩心未？未算，Jordan Brand Services仲有一項破天荒新招—Footwear Trail，店內嘅特設試鞋室地板，鋪咗模仿室內場嘅木板，試鞋時畀到你On Court嘅感覺，仲有多款Signature Shoe畀你試，最特別係90吋大屏幕播放唔同鞋款嘅Video，內容係唔同球星着住自己嘅Signature Shoe做出招牌打波動作，球迷試鞋時跟住片中嘅動作示範，加埋專員從旁協助，就可以實實在在試清楚對鞋到底啱唔啱你，咁就唔會再有買錯鞋嘅Case出現。洗鞋、揀鞋之餘，Jordan Brand Services仲教埋你打波，事關Jordan.com嘅會員可以報名參加Jordan Flight Camp，到球場接受專人指導，提升球技不是夢。
歷代大召集 AJ版嘆息之牆
Jordan 8 Wellington唔只係一個照顧球迷、鞋迷嘅地方，仲係一個朝聖地，好似大門口嘅AJ之牆已經夠晒氣勢，有齊30款歷代AJ之餘，由AJ I到AJ XX9都髹成金色，點解？原來唔同地區嘅Jordan Brand旗艦店，都有唔同嘅主題顏色，香港店就揀咗貴氣嘅金色。除此之外，店內仲有一個大型嘅Jumpman創作裝置，由多個金色嘅Jordan Figure砌成，出自Michael Lau嘅手筆，係香港獨有嘅致敬作品。再到四周睇睇，由地板到柱上，出現形形色色嘅有趣Logo，統統都係專為新舖而設計，每個背後都有出處，好似「六枚戒指」係表揚Jordan六奪NBA總冠軍、「伸脷」就係Jordan最常見嘅小動作，仲有「23」唔只係Jordan嘅球衣號碼，亦係Jordan大宅閘門上嘅標記，想集齊每個圖案嘅小故事，就要到場搵答案了。
人氣之選 必睇AJ XXX
作為亞洲區嘅最大旗艦店，Jordan 8 Wellington嘅商品當然又多又新，除咗有齊Super.Fly 4、CP3.IX及Melo M12等現役「功能派」型號，仲有屬於Sportswear休閒類別嘅Jordan Horizon、Jordan Westbrook、Jordan Spike，以及魅力十足嘅AJ Retro；要數今期人氣最高嘅新品，係AJ XXX，唔係之一，係第一，仲未入手嘅AJ控，記住到場睇實物了。
文︰Dick 攝︰Ben
網址︰Jordan.com 查詢︰2619 1161（中環威靈頓街2-8號Jordan 8 Wellington）
