韓國車嘅質素愈嚟愈好,加上價格實惠,向來都係追求實用型用家嘅恩物。不過,韓國車等於平價車嘅諗法,係時候要改一改,皆因現代(Hyundai)早前開闢新戰線,成立全新品牌Genesis,以生產豪華車款為目標,打頭炮係G90,講Grand,絕對唔會輸畀歐洲大廠,估計售價亦非一般韓國車嘅水平,若然定價高過60萬港元,唔知有幾多人願意出車呢?

論台型,G90去到7系與S-Class嘅水平,絕對唔失禮!

後排設有獨立多媒體系統,坐長途車都唔怕悶。

全車座椅用上高級皮革,駕駛席可作22種角度調校。

車廂布局充滿豪車格調,用料當然係上乘之選。

旗艦版本搭載5.0L引擎,最大馬力達420ps。

音響系統選用Lexicon出品,耳仔再奄尖都唔會有投訴。

中控台設有12.3吋觸控式屏幕,提供豐富嘅行車及導航資訊。

車內附有手機無線充電功能,既方便又Hi Tech。

G90嘅售價仲未公布,普遍預計唔平得去邊,但銷情出乎意料咁好,韓國首日預訂已經售出4,342輛,究竟係愛國情懷驅使,定係G90咁有叫座力?留待海外市場開售先有分曉。Genesis嘅定位高於現代,目的係打入豪華車市場,對手唔止鎖定凌志(Lexus)與Infiniti等日系品牌,仲希望挑戰歐洲豪車品牌,成為國際級嘅車壇明星,例如全新推出嘅G90,車身體積去到7系、S-Class嘅級數,長、闊、高分別達5,205×1,915×1,495mm,先唔理隨車設備與動力配置,淨計台型,已經有百萬豪車嘅氣勢。廠方設計G90時用咗「Athletic Elegance」理念,豪華中帶有運動元素,並非完全傾向行政Feel,呢種風格亦會成為品牌未來嘅設計方向。據知Genesis計劃於2020年前推出五款新車,當中包括Sports Sedan、SUV及Crossover類型。

H-TRAC適應力強

G90推出初期將有兩款汽油版本,分別係365ps嘅3.3L V6雙渦輪增壓,以及420ps嘅5.0L V8,傳動組合都係第二代嘅八前速自動波,重量比上一代輕咗18磅,而且轉檔效率更高。車上預載嘅Intelligent Drive Mode,備有ECO、Smart、Sport及Individual四種駕駛模式,引擎、波箱、懸掛、軚環及穩定控制系統,都會根據唔同模式進行調節,駕駛者可按喜好隨時切換,獲得節能舒適或運動化嘅操控反應。另一方面,Genesis另有H-TRAC四驅可作選配,系統可按實際需要,將最多40%扭力傳輸到前軸,加強喺冰雪等濕滑路面嘅行車穩定性;喺節能模式下,後軸扭力可以高達100%,藉此減省不必要嘅燃油消耗。

超方便手機充電功能

為咗凸顯老闆車嘅身份,車廂用料絕對唔可以馬虎,後排採用獨立雙座位布局,座椅可作多角度電動調校,又有獨立多媒體系統,連同手機無線充電功能、三區恒溫冷氣系統、Lexicon音響,加埋Nappa皮革及原木飾板,打造舒適又奢華嘅乘坐空間。另一方面,G90導入多項主動式安全系統,包括附設行人偵測技術嘅自動緊急煞車、智能盲點偵測、車道維持輔助(Lane Keep Assist)等,大大減低意外機會。廠方表示G90除咗喺韓國發售外,稍後亦會安排喺美國、中國、俄羅斯及中東地區推出,照計唔會冇香港份啩!

文:Simon