Hana拍住Hustler　流年至旺出車示範

新正頭，無論做咩都要講意頭，揸車一族都唔例外，原來由選擇車款、車身顏色，到自訂靚車牌，喺玄學角度上都可以好講究，從而做到催吉避凶嘅作用。嚟到丙申猴年，我哋唔只搵到玄學家林炳南師傅畀流年出車貼士，仲有YouTuber譚杏南（Hana Tam）及車壇新星Hustler做示範，有心喺今年出車或者換車嘅朋友，唔係唔睇啩！

Suzuki Hustler集合咗E、H、L、U及Z對流年有利嘅英文字母，黃色車身有助提升桃花運，仲唔係猴年嘅稱心之選？

林炳南師傅教路，流年最強嘅數字及英文字母組合，就有78、87，以及HG、GH。

3、5、7、8都係流年嘅大利號碼，自組車牌時不妨多用。

唔止車身，Hustler嘅車廂亦有黃色版本選擇，就連座椅綑邊都有黃色元素，最啱想催谷桃花運嘅準車主。

雖然新一代Hustler屬於K-car級別，不過設計師都用盡方法增加車廂置物量，好似前排座墊底下另有置物格，助手席嘅置物格底下就有S-eNe CHARGE節能裝置。

658c.c.直三Turbo嘅馬力達64ps，力量要求當然唔可以強求，不過慳油表現就好標青，耗油量可低至27.8km/L。

唔止林師傅講過，就連Hana都出到聲提你，掛平安符千祈唔好揀大大個，以免阻住視線呀！

車牌組合有玄機

根據林師傅所講，佢用丙申年嘅九宮飛星圖計算過，算出數字「3、5、7、8」，以及英文字母「C、E、G、H、L、N、P、Q、U、W、Y、Z」，都係有助提升運勢嘅車牌選擇，林師傅解釋說︰「當中以數字78或87，以及英文字母HG或GH嘅組合最有用，如果想特別催谷桃花運或者健康運嘅話，大可選擇8，以及H、Q及Z。留意桃花運唔單止男女關係，其實泛指人緣，人緣好，唔止吸引到異性，亦有助各方面嘅運勢；至於健康，唔單止人嘅健康，亦都包括埋部車嘅狀況，座駕少啲『病痛』，車主自然有運行。」就以今次示範嘅鈴木（Suzuki）Hustler為例，品牌及車名嘅英文字母中，就有「E、H、L、U及Z」，至於658c.c.直三Turbo引擎，當中就有「3、5及8」等數字，加埋今年大利嘅黃、黑雙色車身組合，財運、桃花運與健康運都可以齊齊升呢啦！

首選水系顏色

唔止車牌，原來車身顏色對車主運勢影響都大有學問，林師傅續說：「今年立春為寅申相沖，由於金木對戰，代表交通意外特別多，根據五行相生相剋嘅原理，可以利用『金生水，水生木』嚟調和，減少意外機會，而黑、深灰及寶藍色都係屬水嘅顏色，有助化解車禍及不必要嘅麻煩，以至催旺財運；黃、杏及啡色就有助加強桃花運，亦可採用。另一方面，最旺行車安全嘅數字及顏色，分別係7與黑色。」林師傅再教路，可以試試喺倒後鏡掛安全符，有增加行車安全之效，但係切記唔好阻住前方視線，以免適得其反。信唔信都好，玄學嘅嘢，都係但求心安理得，最緊要都係平時揸車事事小心，加上做足汽車保養，自自然然就可提升安全系數啦！