深入新界北　過綠色情人節

年年都係食燭光晚餐過「214」，會唔會行貨咗啲？今年不妨搞搞新意思，走出石屎森林，合力炮製一個綠色情人節。作為駕駛一族，筆者就推薦你逛逛新界北，親手製作意式心形Pizza，再摘埋士多啤梨畀Honey，節目豐富又夠Sweet。嫌遠？今年214係星期日喎，何況有Alfa Romeo Giulietta 1.4T作伴嘅話，又點會怕遠！

園內種植咗大量法國品種嘅有機士多啤梨，去嘅時候已經係兩星期前，士多啤梨仲係青BB，依家應該粒粒都紅卜卜了！

花瓣帶有木瓜果甜香，花蕊就有少少辛辣嘅金蓮花，原產秘魯，唔少歐洲大廚都會用佢做沙律。

園內隨處都係睇得又食得嘅有機食用花，圖中嘅英國玫瑰花味清幽帶甜香，既可泡茶，亦可製果醬。

喺心形餅底加上有機茄醬、意大利辣肉腸、農場芝士，最後放埋啱啱摘嘅有機食用花，就可放入焗爐。

情人節參加Pizza DIY活動，盛惠每位$150，費用已包所需食材及爐火，記住事先預約。

沿水月宮旁邊嘅樓梯拾級而上，就係掛滿紅線嘅姻緣石。

直列式鬼面罩已經夠晒特別，加埋炯炯有神嘅頭燈組，Giulietta確係型。

車仔細細但係馬力十足，加上歐洲品牌，邊個話揭背車只有日系選擇？

前排用咗跑化設計，包覆性與承托力都有高水準表現。

皮革軚環加入金屬裝飾，中控台嘅輕觸屏幕對應隨車音響，又可顯示D.N.A.駕駛模式。

雙圓銀框錶板夠晒立體感，中間屏幕專門顯示Turbo資料。

有機美食夠Sweet有誠意

今次介紹嘅214過節地點，位於打鼓嶺嘅「有心機」農場，佔地25萬平方呎，咁開揚，置身其中心情都舒服啲，唔似屈喺市區咁侷促。園內種滿有機蔬果，包括粟米、番茄、甜椒、沙律菜、士多啤梨、香草，就連食用花都有；園主Joey特別推介法國士多啤梨，園內種咗逾萬棵，每年呢個時候到三月底正係當造期，紅卜卜又飽滿，似足心形Look，而且又甜又多汁，即摘即食分外Sweet，據講唔少香港五星級酒店及米芝蓮名廚都會特別Order做食材，情侶們一場嚟到，車程遠啲都抵番晒啦！

除此之外，園內仲有一座充滿意式風情嘅磚砌烤爐，Joey就為今年情人節開設Pizza工作坊，教大家炮製心形薄餅，利用園內嘅有機食材，包括番茄醬、香草及食用花等DIY，親自下廚特別有誠意。揸車嘅話，可沿沙頭角公路左轉入坪輋路，沿路直駛至昇平村外小巴總站避雨亭，之後左轉入村內小路，依指示牌直駛約五分鐘就到。

小辣椒Giulietta 型格有力

今次同筆者一齊去到打鼓嶺嘅，唔只有男女Model，仲有意大利型格Hothatch—Alfa Romeo Giulietta 1.4T。車頭面譜已經獨樹一幟，盾形鬼面罩附有V形電鍍飾條，如此布局仲有雷同？欖角形頭燈罩內又有直列式LED日間行車燈，Sharp醒外觀人人Like！車廂方面，全車座椅都係真皮製品，夠Grand，隨車音響附有Uconnect功能，透過五吋輕觸式屏幕，就可直接選曲及調控音量，亦可以軚環按鍵代勞，車程再長都有冧歌作伴。雖然Giulietta嘅引擎容積只有1.4L，不過有Turbo與MultiAir發功，馬力高達170bhp，仲好力過唔少2.0L NA車款，加上獨有D.N.A.駕駛模式系統，以及Q2前軸限滑差速裝置，絕對幫到你喺女神面前威威！

好意頭中途站

由九龍甚至港島入打鼓嶺，路程的確唔短，不妨搵個中途站歇腳，筆者推介慈雲山觀音佛堂，一場嚟到可以拜拜姻緣石，沿住佛堂內水月宮旁邊嘅樓梯拾級而上就會搵到，石上早就掛滿善男信女嘅紅線，包冇認錯。駕駛者可沿沙田坳道上山，駛至紫竹亭，然後依照佛堂嘅指示牌而行，大約五分鐘就去到觀音佛堂；留意呢條係單程路，雖然唔會有對頭車，但係山路蜿蜒，又有唔少行山人士經過，駕駛者要加倍留意。離開時，就可沿沙田坳道接衛奕信徑4段沿山路直上，經札山道落山。