相信好多AJ控都收到風，等足一年有多嘅AJ XXX會喺明日起以網上登記方式開售。有部分粉絲早前上網睇過官圖後，對AJ XXX嘅外觀有保留，尤其是鞋頭嘅Jumpman Logo做咗箭靶，不過筆者喺開售前搵到實物上手，真心講，實物肯肯定靚過官圖，唔止我，就連一向直話直說嘅「喬大」喬靖夫都係咁講，佢仲幫手做埋實測，新AJ又過唔過到佢嗰關？

官圖顯示嘅鞋頭標誌，引起唔少AJ控質疑，不過睇過實物之後，相信大家再無疑慮啦！

編織鞋面、3D打印技術，加埋圖中嘅針織鞋領，呢種三合一設計，係AJ系列嘅首次。

鞋尾嘅XXX，唔止係Logo，仲係框形支撐設計，覆蓋範圍大過AJ XX9。

前掌外側嘅支撐片，印有立體嘅星河圖案，代表MJ喺籃球界嘅成就，猶如宇宙大爆炸。

左右鞋舌印有唔同區域嘅地圖，分別代表咗黑人嘅根源與MJ嘅出生地。

AJ XXX嘅鞋面支撐力有所提升，表面仲有精緻嘅紋理點綴。

AJ XXX於本月13及14日接受網上登記，隨後抽籤，中籤者將於16日收到電郵及SMS通知，以及相關嘅取貨安排，祝君好運，一抽即中！$1,699

炮製過多款經典AJ嘅Tinker Hatfield，今次再度為AJ控帶來驚喜。

中底結構沿用Flightspeed，令Zoom Air可以盡情發揮功效，深得喬大歡心。

唔止鞋面，喬大指出鞋尾嘅支撐度都有所提升，增加用家信心。

雖然有網民話AJ XXX同上一代好相似，覺得有欠誠意，其實由一代宗師Tinker Hatfield出手，點會令大家失望？首先，AJ XXX嘅鞋面的確與AJ XX9一樣，都係無縫編織（Woven）製品，不過上一代整個鞋身都係一體化嘅設計，今代明顯將鞋領分割出嚟，變成針織（Knit）部分，據Tinker Hatfield表示，此舉可以加強對足踝嘅支撐度，而且鞋領兩側用上不對稱剪裁，內高外低，撐住足踝之餘又可增加活動角度。另一方面，每一代嘅AJ鞋領都深具代表性，成為潮流指標，今代設計咁出位，又點算係新瓶舊酒？

實物完勝官圖

至於上文提到嘅鞋頭Logo，之前有唔少網民話個Jumpman印得太明顯，甚至突兀，不過實物完全係兩回事，喬大開盒後都話︰「我覺得AJ XXX好靚，鞋面有好多新設計嘅Detail位，而鞋頭Jumpman並唔係簡單印上去，喺唔同角度睇會有唔同效果，若隱若現。」原來鞋頭用咗Mark Smith主導嘅全新印花技術，將Jumpman Logo隱藏喺半透明、透光度高嘅表層之下，喺唔同角度之下，Jumpman Logo嘅清晰度就會有所變化。另一方面，喬大仲好鍾意鞋舌嘅地圖圖案，他說︰「好似象徵咗Air Jordan係代表全世界，我記得AJ 9都有類似設計，代表Michael Jordan係屬於全世界嘅Icon。」細心一看，左右鞋舌代表咗唔同地區，右鞋舌係非洲圖案，筆者相信係代表黑人嘅根源；而左鞋舌印咗北美大陸，東岸嘅其中一處印有藍色圓點，位置應該係MJ嘅出生地紐約。

支撐力顯著提升

今次測試為時大約45分鐘，喬大着住練三分球、走籃、插花及Crossover，試完之後，他對新AJ有咩功能評價？他說︰「由AJ XX8以來，我已經好鍾意Flightplate鞋底，依家改名叫Flightspeed，箇中科技都係一脈相承，呢次嘅Flightspeed保留咗以往嘅優點，前掌Zoom Air做足能量回饋及緩震。」另一方面，雖然AJ XX9與XXX都用咗Flightspeed，但係兩者嘅外底紋理係完全唔同，前者以弧紋為主，新AJ就改用3D技術做出全新嘅複雜紋理，即使AJ XXX定位為室內場鞋款，不過喬大表示打街場都應付得到，他續說︰「AJ XX9係我其中一對最鍾意嘅實戰鞋，與AJ XXX相比，我覺得AJ XX9嘅鞋身柔軟啲，着咗之後，舒服到唔記得自己着咗鞋。不過我有一啲身形高大、比較重磅嘅朋友，佢哋對AJ XX9唔係太安心，如果改着AJ XXX嘅話，鞋面的確有更大支撐力，尤其是鞋筒嘅支撐位比較厚，後跟位又變硬咗，範圍又比AJ XX9大，應該會令佢哋安心晒。」唔止咁樣，事關鞋尾內籠兩側都有厚厚嘅墊位，可以更加貼緊足踝，鞋墊表面又布滿滴膠條紋，減少腳掌滑移機會，再度增加安全系數，真用家可以放心晒。

網址︰http://www.nikestore.com.hk

文︰Dick　

攝︰Paul、Man（部分圖片由Nike提供）