自選香港地王

每逢拜年，就係Table Game大派用場之時，咁又點少得「大富翁」（Monopoly）？早前Hasbro就推出咗「大富翁香港」特別版，除咗有八款傳統棋子，仲加入銅鑄嘅大富翁先生棋子，既精緻又有收藏價值。有權利就有義務，身為大富翁嘅擁躉，玩Game之餘，記住盡「選民」責任，全新嘅2016「大富翁：香港版」推出在即，版圖上嘅22個地段，Hasbro決定以網上投票方式，交由港人自己話事。首階段投票由即日至本月14日舉行，玩家可從遍及港、九、新界及離島嘅50個地段中，選出心水嘅22個；至於由本月16至23日嘅第二階段投票，就會由入圍嘅22個地段中，由玩家揀選其中一個作為今屆「地王」。為咗增加氣氛，網站會根據每日嘅投票情況，不停更新頭15位最高票數嘅地段，而得票最多嗰10個，就會打出「選情告急」牌，隨時可將民意逆轉。自己地王自己揀，身為香港區嘅大富翁粉絲，你唔係唔投票啩！