如果孫悟空唔再留喺唐朝，亦都冇變成蓋世寶迷失喺時空之中，而係一舉跳入未來世界，咁會變成乜嘢樣？答案可能有兩個：一個係日系動畫《太空西遊記》嘅孫行者，另一個就係美系代表、《Beast Machines》嘅第一主角奧迪姆（Optimus Primal），乜個英文名咁熟嘅，梗係啦，佢同變形金剛（Transformers）嘅柯柏文（Optimus Prime）大有關係。

Transfomers Optimus Primal
Year of the Monkey Platinum Edition
建議零售價：$999.9

奧迪姆嘅第二形態，就係力量與智慧並重嘅大猩猩。

按住心口，就會有發光與發聲功能。

無論係人形或動物形態，頭部都可發光。

猴年特別版嘅博派標誌，將猴子嘅面容Key入Logo之中。

重新設計嘅Boxart，係專為猴年特別版而設。

野性版變形金剛

變形金剛唔止可以變成飛機大炮等大小機械，仲可以獸性上身。於1996年面世、由加拿大Mainframe Entertainment製作嘅《Beast Wars》動畫系列，就係另一個版本嘅變形金剛故事，開首都係博狂兩派由施比頓星嚟到地球，不過時空並唔係現代，而係蠻荒世界，地球仲未有人類，而長毛象、劍齒虎等猛獸仲易搵過七仔，兩派嘅機械人就以當時嘅野生動物作為第二形態；《Beast Machines》正係《Beast Wars》嘅續集，而博派領袖奧迪姆就可變成大猩猩。其實《Beast Wars》系列都有喺香港播放，可惜唔似原祖G1系列咁大回響，不過記性好嘅80後、90後動畫迷，相信仲會對奧迪姆有印象啩！

新Look大轉型

每逢農曆新年，Hasbro都會推出特別版嘅變形金剛應節，今年既然係猴年，於是睇中奧迪姆，而且仲係頂級版嘅Platinum Edition，認真畀面。話說原裝奧迪姆黑古核突，膚色仲黑過古天樂，點應節呀？於是新年特別版換新Look，由深灰色變成紅、藍、灰三色，醒目得多之餘，亦都似番原祖柯柏文嘅配色，大有繼承者嘅意義。除此之外，奧迪姆雙臂嘅博派標誌亦有所改動，外圍不變，但內部變成猴子面容，更加應節。大大隻、好意頭之餘，心口與頭部仲會發光，亦都有埋發聲功能，可以播放配樂與怒吼聲外，仲會讀出自己個名：Optimus Primal。除咗特別版呢個賣點外，《Beast Wars》系列嘅行貨玩具，喺香港一向唔多見，自問係老變超級粉絲，又對「姆哥」念念不忘嘅話，唔好錯過今次機會了。

查詢：2738 8300（Hasbro HK）

文：Dick

攝：Fanny