雖然好多功能向嘅跑鞋都有齊男女裝版本，不過喺設計當初，大部分概念都係以男用家為依歸，女裝版本只係喺尺寸上作出調節，作為男生嘅筆者，都覺得大細超喎！既然依家提倡女生都要動起來，運動女生至少加10分，市場上又點少得專為絲打而設計嘅跑鞋？

PureBOOST X　$999/款

PureBOOST X　$999/款

PureBOOST X　$999/款

外底用咗Ultra Boost嘅Stretch Web網形款式，令全掌式Boost中底有更多延伸空間。

Stretch Mesh鞋面設有多個透氣孔，腳汗速速走。

中空腳弓設計，用家蹬地時可以自然拱起腳掌，唔會同全掌式中底鬥力。

GT SN X Bra Mel　$299

Pure X Jacket　$599

本月初上架嘅adidas PureBOOST X，輕盈外觀唔只充滿少女風，更重要係貼近女生嘅修長腳形；中底方面用咗全掌式Boost，由鞋頭到鞋尾都發揮到出色嘅緩震與回彈作用。最特別嘅地方係Floating Arch拱形足弓結構，足弓位置嘅鞋身與中底破天荒改用中空式設計，有助加強腳弓嘅承托力，尤其是蹬直腳背、用前掌撐地時，腳弓自然向上拱起；喺傳統設計上，鞋身與中底全方位密封，中底好難與腳弓完全脗合變形，Floating Arch就可解決呢個問題，讓腳弓位置得以自然升降，唔使再同中底鬥力，而中底形狀依然保持一致，令全掌任何角落嘅緩震與回彈表現都不受影響，加上鞋身用咗高透氣、高彈性嘅Stretch Mesh製成，令腳掌更加活動自如。中空腳弓加上薄身鞋面，好似有欠穩陣，其實adidas早就見招拆招，鞋身兩側設有框架形組件，並與鞋帶相連，索緊鞋帶後，鞋身就會加倍貼腳，以免跑動時腳掌出現過多扭動甚至移位。PureBOOST X體貼成咁，睇怕好快輪到巴打葡萄，Floating Arch又有冇機會移植到男裝跑鞋先？

查詢：2730 0157（尖沙咀漢口道17號adidas旗艦店）、2789 8198（旺角豉油街21號C adidas Megastore）

文：Dick　

攝：Chris（部分相片由adidas提供）