昨晚睇完花車巡遊，今日都係時候到自己動身，嚟個遊車河行大運！新正頭遊車河，當然要講意頭，玄學家林炳南師傅就教筆者，今日係大年初二，大吉嘅起行時辰有「巳」、「未」及「酉」時，而好運方位就喺南方，喺以上時段向南行就萬事大吉。係真唔係呀？玄學嘅嘢一試無妨，可信度起碼高過政府開口埋口嘅「一帶一路」，至少唔會攞錢嚟嘥！

林師傅表示，就算今日去唔到香港仔、赤柱咁遠，只要車程一路向南行，都應到行大運嘅功效。

大年初二嘅最佳方位喺南方，從新界或九龍區往港島區而行就最適合。

車廂空間夠晒闊落，夠位放置賀年裝飾，遊車河行大運都特別有Feel。

尾箱大成咁，全家人嘅行李都放得落啦！

CX-5採用2.5L直四引擎，馬力192ps，香港地夠用有凸啦！

沙田公園一帶都布滿賀年裝飾，洋溢歡樂氣氛。

雖然仲未到觀音開庫，但禮多人不怪，一場嚟到，唔係唔去同觀音娘娘請安啩！

赤柱位於港島南端，嚟到呢度，成個行大運路程當堂圓滿晒。

三大出發良辰

根據林師傅所講，南方係今日嘅最佳方位，從香港地理而言，即係南區一帶，例如赤柱及香港仔等地，遊車河向南而行，又夾啱時辰起行嘅話，有助催谷流年運勢，林師傅說︰「今年係丙申靈猴之年，年初二稱伙四入中宮之日，南方係最佳方向，至於大利時辰分別係『巳』（早上9時至11時）、『未』（下午1時至3時）及『酉』（下午5時至晚上7時），喺呢啲時間出發，對提升財運及健康運都相當有利。如果閣下時間有限，去唔到赤柱、香港仔咁遠，只要車程以南方為大方向，都收到行大運嘅作用。」

CX-5內外醒神

今次同大家示範行大運嘅座駕，當然要龍馬精神見得人啦，佢就係全身紅噹噹嘅萬事得（Mazda）CX-5了，唔只賣相醒目，車廂布局仲好實用，全車五個座位都有充足嘅個人空間，403L嘅車尾置物量，亦足夠放置全家人嘅行李（如果只坐兩個人，但係行李超多，大可收起後排，車尾置物量最多可擴充至1,560L）。至於引擎表現亦都生生猛猛，2.5L SKYACTIV-G直四i-stop引擎可輸出192ps馬力及26.1kgm，但係平均耗油量可低至14.3km/L，好力之餘又慳油，遊車河就更加好心情啦！

行大運Check Point

起步點：沙田公園

今次我哋以赤柱為目的地，出發點就係沙田公園，因為從地理上沙田位於全香港嘅正中央，況且公園一帶設施齊全，醫飽個肚就可以施施然出發。沙田公園位於源禾路2號，公園有多個入口，其中沙田大會堂係最常用、最易搵嘅入口，之後朝住城門河方向南行。留意公園不設停車場，想泊車嘅話，就要選擇附近大型商場嘅停車場。

沙田公園

地址：源禾路2號

開放時間：6:30am-11:00pm

中途站：紅磡觀音廟

從沙田出發往南行，可選擇大埔公路往九龍段，但係我哋揀咗更快捷嘅獅子山隧道，沿窩打老道往公主道方向往紅磡而行。既然係新正頭，中途停車去廟宇參拜係好正常，不過呢啲時日去黃大仙廟或者車公廟，只怕人太逼太嘥時間，筆者就改去紅磡差館里嘅觀音廟，即係「觀音開庫」嗰間呢！雖然每年嘅開庫日子係正月廿六日（3月4日），但係禮多人不怪，不妨提早喺今日參拜觀音娘娘，話唔定聽日跑馬特別有靈感呢！

觀音廟

地址：紅磡差館里18號

開放時間：8:00am-5:45pm

目的地：赤柱廣場

之後經紅磡海底隧道再往香港仔隧道，繼而沿香島道及大潭道，就可去到赤柱了。赤柱廣場設有停車場，泊好車，就可徒步往沿岸方向而行，參觀美利樓之餘，又可以幫襯赤柱大街嘅中西餐廳，筆者已經事先打探過，多間商戶都話今日會開門營業，大家唔怕餓親啦！時間尚早嘅話，正好準備回程去中環或者尖沙咀，霸定位睇賀歲煙花，成個Planning唔只好意頭，仲好充實呢！

汽車提供：3768 4888（宏益香港）

文：Samuel　攝：Paul　模特兒：Jenny　鳴謝：玄學家林炳南