仲有幾日就到農曆新年，無論屋企、商場都充滿過年氣氛。想再熱鬧啲？不如部手機都加啲新年元素啦！一於Download唔同類型新年限定Apps，既有相片特效，又有遊戲之類，玩一玩猴年就旺上加旺！

Photo Collage

Chinese New Year 2016

微電影

靈猴獻瑞賀新年

筆姫年賀2016

あけおめッ！スタンプミー2016

Banana Kong

Benji Bananas

《Photo Collage—魔術相片拼貼》自製過節靚相

台灣電腦品牌Asus出品，所有Android手機都可以用到。除咗提供拼貼相片、後製相片等基本功能，更因應新年推出大量應節貼圖及相框，輕輕鬆鬆就整到充滿新春氣氛嘅相片！

下載費用：免費　平台：Android

《Chinese New Year 2016》百款Wallpaper

App內有超過一百幅新年主題嘅相片，可以下載分享畀朋友之餘，亦可以直接設定成手機的Wallpaper，初一至初十五，日日同手機換新裝都冇問題。

下載費用：免費　平台：Android

《微電影》賀歲短片上畫

整相片太悶，不如製作新春短片。呢款App可以將照片製成短片，並加入音樂、字幕等，最正就係內置咗多款新年電影主題，有齊新年背景同音樂，撳兩撳就完成15秒賀年短片！

下載費用：免費　平台：Android

《靈猴獻瑞賀新年》接福小玩意

玩家控制靈猴接住從天而降嘅燈籠，但要燈籠上嘅文字符合畫面頂顯示嘅揮春祝賀語。留意，接到大吉的話，祝賀語就會即時轉換，接中炮仗的話，就冇得玩喇！

下載費用：免費　平台：Android

《筆姫年賀2016》東洋賀卡參上

畀大家自製日式賀卡，介面、公仔、字款都充滿日系嘅柔和感覺，仲可以加入星星、心心等閃爍效果圖案。此App內置144款賀年卡款式以及430類免費圖案，包保作品合心水。

下載費用：免費　平台：Android、iOS

《あけおめッ！スタンプミー2016》日式賀年之道

雖然日本人係過新曆年，但此日本App內仍然提供大量靈猴公仔，加上表情多多，超可愛。大家可以DIY不同賀詞同埋公仔，既有新年氣氛又不失創意。

下載費用：免費　平台：Android

《Banana Kong》靈猴親戚也拜年

King Kong係靈猴嘅親戚，一於「單撈」埋佢啦！玩法似足《Super Mario》，控制主角跳上跳落收集香蕉，食夠香蕉，就可以發動「Power Dash」，另有超多道具可以購買。

下載費用：免費　平台：Android、iOS

《Benji Bananas》考你身手抓良機

靈猴擔正做主角，玩家要控制猴子抓緊繩索，橫越樹林，並且取得香蕉過關。好玩在於玩家只需要用一隻手指就可以玩得到，按實屏幕可令猴子抓緊繩索。

下載費用：免費　平台：Android、iOS

文：Vincent

攝：Man