喺設計學上，成日都話「簡單就是美」，但係愈簡單、愈Pure嘅事物，往往先係難度最高嘅挑戰！相信唔少球迷，尤其是奧斯爾（Mesut Özil）、奧斯卡（Oscar），以至保羅普巴（Paul Pogba）嘅粉絲，眼利嘅話都會留意到，以上球星今期都換咗新波Boot，青BB夠搶鏡之餘，最特別係……對Boot竟然冇鞋帶！呢款前所未有，愈簡單愈有殺傷力嘅adidas Football新武器，名為ACE 16+ Purecontrol。

根據奧斯爾所講，原來佢一直都想要一對冇鞋帶嘅波Boot，以前綁鞋帶時佢會不斷打結，打到落鞋帶尾為止，如今ACE 16+ Purecontrol面世，正好令佢夢想成真。

ACE 16+ Purecontrol FG
$2,399

Primeknit鞋身又輕又薄，外底仲改用全新設計，令雙腳動作可以更快更靈活。

強調控傳嘅ACE 16+ Purecontrol，係唔少中場大師夢寐以求嘅拍檔，當中包括巴塞嘅中場指揮官拿傑迪錫（Ivan Rakitic）。

Sam Handy（左）與Dean Lokes主導設計嘅ACE 16+ Purecontrol，係品牌首款冇鞋帶嘅波Boot，破格程度正好體現三間精神—Impossible is Nothing！

X 15.1 CT
$729

鞋側內藏支撐框架，表面就係透氣網層，功能性之高一眼可見。

X 15.1 CT嘅鞋頭用料相當薄，球感傳遞夠實在，亦有輕量化作用。

X 15.2 CT
$529

兩者嘅外底都用上相同設計，只係顏色有別，密麻麻嘅底紋既有充足抓地力，薄身鞋底造就低重心效果。

X 15.2 CT嘅凹凸鞋面設計，有助增加控球效果。

波Boot發展軌迹：Less is More

最完美嘅波Boot，就係着咗等如冇着？以上唔係黎天王嘅金句，而係ACE 16+ Purecontrol嘅設計哲學。唔信你睇睇波Boot嘅發展歷史，由最早嘅高筒設計，又大又重，之後不斷變細、變輕、變薄，鞋身用料亦由厚身嘅真皮，變成纖薄嘅合成物料，再到依家最新嘅織物材料，目的唔只減少雙腳負重，更重要係消除腳面與足球之間嘅阻隔，從而得出最實在嘅球感。其實以合成物料與織物材料嘅纖薄程度嚟講，已經好接近呢個目標，不過始終有一關過唔到—鞋帶。早年嘅adidas adizero F50波Boot，都試過將鞋身表面延伸，遮晒成個鞋帶區，令成個鞋面都變成平滑一片嘅控球區，不過此舉會增加鞋面厚度，實際作用與原先目標背道而馳。呢個看似Impossible嘅任務，終於喺2016年完美達成，adidas Football設計團隊嘅Sam Handy與Dean Lokes，就將鞋帶變成Nothing，炮製出品牌史上首款冇鞋帶嘅波Boot。

Primeknit鞋面無阻無隔

據品牌所講，完全冇鞋帶嘅ACE 16+ Purecontrol，成個鞋面都變得平滑一致，而且又輕又薄，無論任何位置都可傳遞實在嘅球感，而且穿着感受就似戴咗手套一樣活動自如；Sam Handy接受海外媒體訪問時，就提及喺長達24個月嘅開發日子中，最重要，亦係最困難嘅地方，就係飛走鞋帶之後，點樣做到可以輕易着上，着咗之後又可以緊貼腳形呢？關鍵在於品牌嘅Primeknit織物技術。早喺2014年嘅世界盃期間，adidas已經將Primeknit帶到足球場，輕薄之餘，今時今日嘅Primeknit物料仲多咗彈性設計，針對腳掌唔同位置而做到唔同嘅鬆緊度，加埋伸展度高嘅中筒剪裁，易着之餘，感受就似着多對波襪而已，比起以往任何波Boot都輕盈得多。或者你會擔心，鞋身咁薄，會否唔夠支撐？對此adidas就有三招應付，其一就係Primeknit，呢種材料本身已經有好高韌性；其二係踭位外圍加咗TPU罩形組件，用嚟Lock實腳踭；最後一招係鞋籠用咗貼腳、彈性高嘅Techfit技術，做到貼腳而唔夾腳。呢款革命性嘅新波Boot，喺上月底已經由多位球星率先穿着上陣，至於你我他等平民用家，亦有機會據為己有，事關啱啱喺香港正式上架，不過唔只香港，全球市場亦只限於指定商戶有售，而且數目極少，擺到明唔為賺錢，純粹Showoff，加上冇得上網預訂，想擁有嘅話，惟有快啲落舖搶貨。

街場新利器

與ACE 16+ Purecontrol同步上架嘅，仲有專為街場而設計嘅X 15.1 CT與X 15.2 CT。踢街場，空間細，講究節奏快、轉數高，故此無論係15.1與15.2，都標榜輕量化、低重心，外底仲布滿防滑紋理，令用家可以更快、更靈活地加速、轉向。X 15.1 CT鞋頭纖薄有利傳送球感之外，最大特色係鞋身兩側設有透氣網層，網層之下係支撐框架，做到既舒服又有充足嘅支撐力，鞋領剪裁比傳統街場波Boot稍高，而且多咗泡棉墊位，更易緊貼足踝而不失舒適性；X 15.2 CT嘅鞋面採用合成材料製成，耐用度高，而鞋身內外兩側以及鞋頭都有立體坑紋，藉此加強與足球嘅摩擦效果，一控一傳都更加有Feel。

查詢：2527 0217（旺角通菜街63-65號adidas Football Store）、2317 1686（旺角上海街555號朗豪坊7/F Futbol Trend）

文︰Dick　攝：Homan（部分圖片由adidas提供）