渣馬過咗,唔代表跑手可以放鬆,反之大大小小嘅本地長跑賽事,都喺渣馬之後一個接一個湧到,想突破自己嘅跑手,更加唔可以鬆懈;PUMA嘅旗艦級跑鞋Ignite,啱啱出咗第二代,幫大家提升練習效果。緩震與回彈嘅PU泡棉中底當然唔少得,鞋身改用三層式全新設計,令透氣度與貼腳度都有所提升,加上男女裝都有多色選擇,比起第一代唔只舒服咗,賣相亦Sharp醒得多。

Ignite V2 $899(男女裝同價)

鞋尾設有罩形穩定組件外,品牌商標四周用上反光物料。

鞋身改用全新三層式結構,特意加強透氣能力。

全掌式Ignite中底布滿箭嘴形立體圖案,令中底更易壓縮及回彈。

鞋尾內籠多咗V形矽膠膠邊,令鞋籠更加貼腳。

前後掌嘅主要掂地位置,都用咗EverTrack物料加強耐用度。

新鞋墊布滿泡棉墊位,額外增添緩震能力。

NightCat Jacket $699(男女裝同價)

Hooded Jacket $499(女裝)

Run the World Tee $279(男裝)

Light Weight Single $259(男裝)

Rebel-Run SS Tee $259(女裝)

NightCat 7'' Short $299(男裝)

Faster than You Short $299(女裝)

鞋面大變身 汗氣速速走

Ignite V2嘅最大變動在於鞋身結構,今次改用三層式設計,分工清晰,內層係具有高度伸縮性嘅尼龍物料,配合柔軟、薄身嘅麖皮鞋舌,發揮貼腳作用;中層係透氣網布,氣孔間隔比上一代大,更易排走鞋籠嘅汗氣;鞋頭、鞋帶區以無縫熱融方式,喺透氣網布之外加上支撐組件,尤其是踭位嘅罩形組件,以及鞋身兩側嘅大型品牌標誌,都有鎖實腳掌嘅作用。踭位設計更加做足功課,整個鞋領嘅內藏泡棉比上一代多,可以舒舒服服緊貼足踝之餘,鞋尾內籠嘅正中央加咗幾條3D編印嘅V形矽膠膠邊,藉此加強踭位與腳踭嘅貼合度,減少因過度摩擦而造成刮腳嘅機會。鞋墊方面亦有明顯改動,上一代嘅表面平平無奇,V2就加咗大量立體嘅泡棉墊位,作用就如鞋尾嘅矽膠膠邊增加貼合度之餘,仲有輕微嘅緩震效果。

特製泡棉中底 路遙更好力

鞋底布局大致維持原狀,中底沿用全掌式PU Ignite,係PUMA自家開發嘅特製PU泡棉,可以高度吸收落地時嘅撞擊力之外,仲會即時轉化為回彈力,有助減少能量消耗,換言之,幫到跑手應付更長距離嘅練習。為咗加強PU Ignite嘅緩震與回彈表現,全掌嘅內外兩側都壓印咗立體嘅箭嘴形紋理,作用係落地時中底物料更易壓縮,從而提升緩震到回彈嘅效率。另一方面,外底設有一條長紋,由後掌一直伸延至前掌,用嚟引導前後掌嘅能量傳遞,至於主要嘅掂地位置,就加咗耐磨之餘抓地力高嘅EverTrack物料,以符合Ignite V2作為長距離練習鞋款嘅功能定位。

NightCat 至夾夜跑

跑步點只要有鞋,何況呢期天氣冷、風又大,帶定Windbreaker練跑,就冇咁易攝親啦!PUMA同步推出嘅NightCat Jacket,防風之餘又薄又輕,而且上半身與兩邊衫袖嘅潑墨圖案用咗反光塗料,夜跑至啱用。同步上架仲有Hooded Jacket,特色在於衫背底部設有內袋,練習途中身體已經Warm Up完畢夠晒熱嘅話,就可將成件Hooded Jacket摺入內袋,而袋身設有橡筋套入上臂之用,就算中途除低件Hooded Jacket,都唔使綁喺腰間咁累贅啦!

查詢︰2377 1775(尖沙咀海港城港威商場2樓2605-2606號PUMA Store)

文︰Dick 

攝︰Chris、Chun