萬事我代勞　Mazda3 SKYACTIV-G 2.0 R-Grade

揸車絕對高度考驗手眼協調，既要睇住儀錶有冇超速，又要計準Cut線及入線時間，加埋揸軚、油門、迫力等控制動作，手、腳同雙眼都幾唔得閒，何況喺彎多路窄又易塞車嘅香港！Mazda3 SKYACTIV-G 2.0 R-Grade勝在夠體貼，為車主預備咗多項「懶人包」，主動消除過線/出路口/準備停靠路邊時唔記得打燈，又或者落雨唔記得開水撥等問題，夠晒User Friendly。

R-Grade嘅輪圈尺寸多達18吋，比Core Edition足足多咗兩吋。

皮革軚環背後設有轉檔撥片，讓駕駛者手不離軚都可轉換波檔。

中控台嘅七吋屏幕對應後泊鏡頭，車尾情況一目了然。

軚環前方設有投射式顯示裝置，駕駛者毋須轉移視線，都可知道車速變化。

後排空間有交代，椅背又可以60:40嘅比例收起，靈活增加置物量。

用咗SKYACTIV技術嘅2.0L引擎，馬力充沛，而且耗油量低。

多得Hatchback嘅車體設計，車尾置物量分外可觀。

今次試車試足四日三夜，而且係頂級Hatchback版本，既有討好嘅外形，性能亦夠用有餘，最吸引都係多種「懶人包」，包括自動開關頭燈、自動轉向頭燈、自動調校Bi-Xenon頭燈連清洗裝置、雨點感應自動開關水撥，對於大頭蝦嘅車主而言，真係幫到手！至於LED日間行車燈及尾燈組合，仲有電動調校及摺合門邊鏡連指揮燈，亦對提升行車安全有所幫助。除此之外，R-Grade嘅18吋鋁合金輪圈比Core Edition大咗足足兩吋，賣相更有台型。

投射功能幫你集中精神

R-Grade仲有智能免匙系統連按鈕式啟動系統，想撻車，連拎車匙嘅動作都可以慳番；揸車時，Active Driving Display投射式行車資訊顯示屏及附設轉檔撥片嘅多功能軚環，讓駕駛者嘅視線保持前望，減少分心機會。雖然R-Grade比Core Edition貴$30,000，但係除咗上文提及嘅裝備，R-Grade仲有Human Machine Interface多媒體控制介面、Commander Control多媒體控制鍵、原廠高級皮椅、電動調校駕駛席及電動天窗都已經列入標準裝備清單內，不另收費，音響系統還支援藍芽，既可與手機連線變成免提，又能以串流形式播歌，方便之至。

實試油費只需$1.2/km

至於動力配置與Core Edition相同，都係以2.0L直四SKYACTIV-G引擎為主，提供165ps馬力及21.4kgm扭力，配合六前速SKYACTIV-Drive自動波，帶嚟敏銳、直接嘅加速反應，就連節能都交足貨，SKYACTIV-G汽油引擎喺調校上已經考慮到慳油需要，隨車又有i-stop引擎怠速自動熄火功能，以及i-ELOOP制動力回收系統，揸足四日、行咗大約480km，還車時嘅平均耗油值只係12.1km/L，平均油費僅$1.2/km，早知咁慳就借多兩日啦！