二代Moto 360　長氣新設計

上年以圓形錶面兼簡約設計掛帥而打響名堂的Moto 360，第二代行貨正式有售。新作依舊係圓形，錶殼是316L不銹鋼製作，錶耳部分就由上代的內嵌設計改為外露式，配合全新擺位、位於兩點鐘位置的錶冠按鍵，襯埋46mm大錶面，個人覺得設計似足傳統手錶，觀感極好！錶帶方面，闊度有22mm，原裝提供干邑色Horween真皮或黑色鋼錶兩個版本，值得一讚是原裝錶帶特別加入鎖扣，一拉即可將錶帶拆下，方便替換。除了外觀升級，功能上亦有所提升，錶底設有光學心跳監測器，並且支援IP67防水防塵標準，仲有埋Wi-Fi，毋須手機都可以更新及執行語音操作等。電量方面，內置400mAh電池的Moto 360二代可使用兩日，亦同上代一樣提供無線充電底座。