雖然上畫唔夠一個月，但係《Star Wars: The Force Awakens》嘅票房已經贏到開巷，迪士尼嘅高層當然瞓着都會笑番醒，不過對廣大嘅星戰迷而言，戲中嘅多個謎團，就肯定發夢都會掛住，例如男主角Finn明明係凡人一個，點解識用光劍？最令筆者搲頭嘅係，光劍唔係無堅不摧嘅神兵咩？點解EP.7嘅白兵竟然招架得住，仲同手執光劍嘅Finn打成平手（實情係白兵稍佔上風先真）。Hot Toys啱啱宣布推出1/6 Finn，固然係意料中事，估你唔到嘅係另外再將Finn與勇戰光劍嘅白兵組成二合一Boxset開訂，唔解謎不特止，仲重創我哋嘅銀包；仲有成個月先過農曆新年，姨媽姑姐大伯舅父，可唔可以預支利是畀我應急呀？

Finn可以獨立預訂（MMS345），但係Riot Control Stormtrooper就連埋Finn作為Boxset開售（MMS346），對於只係想要Riot Control Stormtrooper，而對Finn興趣麻麻嘅星戰迷嚟講，到底今次入唔入手好呢？相信內心一定有唔少掙扎，筆者絕對感同身受…

除咗光劍，Finn仲有Han Solo交畀佢嘅步槍傍身。

就同之前同廠嘅Obi-Wan與Luke Skywalker一樣，Finn嘅光劍都有LED發光功能。

論頭雕神似度，由Seung Min, Kang與J.C. Hong聯手炮製，當然唔會令人失望，可惜係只得一款表情，寡咗啲。

Riot Control Stormtrooper除咗有專屬嘅警棍與護盾，亦有一般白兵都有嘅F-11D雷射步槍，留意警棍與步槍都內藏磁石，可以吸喺右邊大髀。

防暴警棍可以伸長縮短，至於反手握法就同枴相近，唔通編入Riot Control部隊嘅白兵，例必食過夜粥？

真係有粉絲要求迪士尼幫TR-8R拍外傳，你估又會唔會成事呢？

唔少白兵迷幫TR-8R畫新造型致敬，從英氣程度就睇出大家對佢有幾Like。

Finn光劍初體驗

有人話，今集星戰劇情致敬成分太重，創意不足，不過喺角色設計上，大膽程度唔到你唔服，唔只以女主角為第一主角，仲以黑人演員作為男主角，開創星戰電影嘅先河。由John Boyega飾演嘅Finn，喺戲中有兩個造型，HT 1/6 Finn就採用咗棄暗投明後嘅便服Look，素體高約30cm，着住反抗軍王牌機師Poe送畀佢嘅皮褸，剪裁細緻之餘，仲做足舊化工夫。頭雕方面就由Seung Min, Kang與J.C. Hong分別負責雕工與塗裝，準確還原Skin Head、高眉骨、闊鼻翼、厚唇及深法令紋等面部特徵。附件方面，HT嘅星戰Figure有一項獨門殺着，除咗早前嘅EP.5 Luke Skywalker（DX07），其餘所有用光劍嘅角色，包括EP.4嘅Luke Skywalker（MMS297）、Obi-Wan（MMS283）以及Darth Vader（MMS279）等，都有光劍發光功能，今次嘅Finn都唔例外。話時話，點解Finn識得用光劍，呢個問題留待喺EP.8搵答案（2017年先上畫，有排等……），至於Finn喺EP.7開場時嘅白兵造型，HT又會幾時做埋呢？

最勇白兵能屈能伸

至於前文提到，喺Takodana星球上遇到Finn，大鬧佢係「叛徒」（Traitor）之餘，仲當佢把光劍冇到，同Finn大戰多個回合嘅白兵，相信好多星戰迷都對佢印象深刻，尤其是白兵迷（包括筆者在內）直頭封佢做偶像，試想想，由EP.1到EP.6，有邊個白兵對住光劍唔使輸，仲打破光劍咁多年嚟嘅屈機神話？原來呢位白兵專責防暴任務（Riot Control），HT就依照電影中嘅人設，主體沿用MMS317嘅First Order Stormtrooper，唔算特別，最大賣點落於Riot Control嘅專屬裝備，包括正方形嘅防暴護盾（Riot Shield），以及令呢位白兵哥可以無懼光劍嘅防暴警棍Z6 Riot Control Batons；喺電影之中，呢支警棍唔只擋到光劍，冇畀佢斬斷之餘，仲有伸縮功能，HT嘅1/6版本亦可做到拉長縮短，美中不足嘅係，警棍伸長後嘅前半截係有放電功能（筆者翻睇咗Trailer好多次，甚至逐秒定格去睇，雖則放電效果唔明顯，但堅係有），但係HT版本未有喺呢方面再作加工，唔知正式推出大貨時，會唔會加番件特效Parts呢？

兵之典範

Finn仲係白兵之時，都有個編號叫做FN-2187，可憐同佢對打嘅Riot Control Stormtrooper，唔只出場時間只得幾十秒，仲要冇名冇姓，連編號都冇！不過唔緊要，呢位史上最忠心、最勇敢嘅白兵，已經贏得全球白兵迷嘅尊敬，喺外國就有粉絲以「Traitor」為基礎，幫佢設計咗個編號「TR-8R」，仲幫佢開埋Facebook（TR8RhatesTraitors），又有無數以佢為主題嘅改圖，甚至喺《Change.org》網站搞咗個聯署行動，要求迪士尼幫佢拍外傳電影。做兵做到咁多人Like、咁多人記得，雖死何憾呢？

＊圖片所示仍屬產品原型，與正式推出版本或有少許分別。

文︰Dick（圖片由Hot Toys提供）