距離渣馬唔夠一個月，報咗名嘅你，備戰狀況如何？之前我哋介紹過唔少練習鞋款，又啱唔啱使先？不過再啱Key都好，如果你對今次比賽有更大期望，甚至想破PB嘅話，就要好好考慮同依家對練習鞋暫時拆夥，換個新Partner了。被視為「攞牌鞋」嘅adidas adizero adios系列，最近推出咗全新版本adios 3，戰鬥力有冇高到？就由試着咗大半個月嘅長跑達人「楊Sir」楊肇麟現身說法。

adidas adizero adios 3
$1,299/對

adidas adizero adios 3
$1,299/對

新adios嘅中底沿用全掌式Boost，維持高度嘅緩震與回彈表現。

adios 3嘅鞋頭變闊咗，對闊掌嘅跑手，尤其是亞洲人而言，絕對係好事。

鞋身用上Coolever Mesh，透氣能力相當高。

前掌外底嘅磨損程度特別高，故此針對性採用Continental橡膠物料，加強耐磨能力。

鞋底中間設有Torsion System，協調前後掌嘅動作，減少足踝扭傷嘅機會。

唔只前掌，後掌都有充足嘅耐磨設計，就係以adiwear為主材料。

Torsion System嘅TPU組件延伸到後掌內側，發揮更強嘅穩定作用。

adios 3嘅重量大約係230g，比起上一代輕咗5g左右，以比賽鞋而言，當然係愈輕愈好。

據楊Sir教路，距離比賽前約20至30公里嘅練習距離，就要改用薄底嘅比賽鞋，令雙腳同新鞋有足夠時間Run In。

除咗功能取向，跑鞋亦有用途之分，簡單而言分為兩類—專為練習而設嘅厚底鞋，以及薄底嘅比賽鞋，adios系列就係後者，而且戰績彪炳，就以去年嘅紐約馬拉松為例，前10位選手當中，就有4位係adios 2嘅用家；最威水係肯亞選手Dennis Kimetto，佢着住adios 2參加同年嘅柏林馬拉松，以2小時2分57秒贏冠軍，仲以26秒之差打破馬拉松世界紀錄，稱adios為「攞牌鞋」，好合理啫！

楊Sir教路：Run In要及時

厚底鞋同薄底鞋嘅最大分別，顧名思義在於鞋底，具體啲講就係中底嘅厚薄，厚者，落地時可以吸收更多嘅壓力，發揮更大嘅緩震效果，不過針冇兩頭利，厚底既會減弱提腿時嘅反應，仲會「消化」咗部分由壓力轉化為向前推嘅衝力，而且厚底鞋嘅鞋身結構往往有較多嘅保護設計，增加重量在所難免，故此喺速度要求唔高，但以安全為先嘅平常練習中，厚底鞋就大派用場。相反，薄底鞋會犧牲部分保護性設計，例如減少中底嘅厚度，以及簡化鞋身結構，換取輕量化、低重心與反應快等有利加速嘅功能特性，喺全力一博嘅比賽上，就可幫助跑手全力發揮，故此要求高嘅跑手，都會有齊兩款鞋，應付唔同場合需要。

雖然話薄底鞋係比賽利器，但絕對唔係比賽時先至出動，正如賽車都要有Run In期，先至可以培養出跑手與跑鞋嘅「默契」，對此楊Sir建議︰「如果你想買一對薄底鞋用嚟比賽，我建議最好比賽前嘅兩至三星期，更準確嚟講，就係賽前嘅20至30公里練習距離，就要着嚟練跑，當中最好包括較高速度嘅練習，例如Interval Training，可以速度快而距離短，又或者距離稍長之下Keep住用比賽速度，令雙腳有足夠時間、機會，喺鞋籠內模仿出最極端嘅情況，即係最大程度上，會將鞋籠撐到幾闊幾大，只有喺速度較快嘅練習先至模仿得到。」做足準備之下，比賽時腳掌就唔會對新鞋有適應問題，增加破PB嘅本錢。

實着評語：鞋頭闊咗多人Like

之前提到adios 2有咁多威水史，新版本又有冇本錢繼續發威？首先喺中底設計上，沿用adios 2嘅全掌式Boost物料，緩震與回彈能力都係adidas嘅最強選擇，而試着咗adios 3已經大半個月嘅楊Sir，就對我哋分享佢嘅用家報告，他說︰「同adios 2相比，adios 3會輕身啲，官方數字係230g，比上一代輕咗5g，不過對一般用家而言，其實唔會Feel到太大分別，至於變輕咗嘅主要原因係鞋面大幅度用咗Coolever Mesh，減磅之餘，仲有好高嘅透氣能力。外底方面，上一代嘅前掌用咗石墨顆粒，今代唔見咗，由Continental橡膠物料覆蓋晒成個前掌外底，如果喺運動場練跑嘅話，呢個變化的確會減弱咗少少抓地能力，不過用喺一般平路嘅話，就會更加耐用，而且好多adidas嘅跑鞋都有用Continental外底，我亦都着過，喺濕地上有優越嘅性能表現。」實際而言，絕大部分嘅長跑比賽路線，都係以街道為主，只有終點前嘅短距離喺運動場進行，故此adios 3喺外底用料上嘅變化，其實更加切合實戰需要。

除此之外，對於腳形偏闊嘅亞洲人而言，楊Sir認為adios 3會令用家着得更開心，他說︰「今代adios嘅鞋頭比以前變闊咗，對於腳掌較闊，嫌以前嘅adios偏窄嘅跑手而言，新adios就可以令佢哋開心番，至於鍾意着厚襪嘅跑手，adios 3嘅呢項新設計，同樣可以令佢哋開心晒。」

查詢︰2789 8198（旺角豉油街21C地下adidas Mega Store）

文︰Dick

攝︰Homan