飛走雪橇　MINI One Countryman

相傳聖誕老人會喺今日坐「雪橇」，爬上煙囪送禮物，但係隨住氣候轉變，落雪嘅地方愈嚟愈少，雪橇仲有冇用武之地？再講，既係「老人」，仲要佢老人家爬煙囪，唔合乎「職安健」指引喎！計我話，就算民間傳奇都要與時並進，不如建議聖誕老人改用MINI One Countryman，鮮紅色車身夠應節之餘，渾圓線條夠親民，最重要係車廂夠大夠實用，放幾多禮物都得，仲唔係聖誕老人嘅好幫手？

前排空間之大，連聖誕老人都坐得落，何況係嬌滴滴嘅Xmas Girl？

車廂布局簡約有序，切合實用型車迷所需。

MINI One Countryman有10種車身顏色選擇，要揀最應節嘅，當然係鮮紅色啦！

六前速自動波表現不俗，而且操作容易，新牌人士都易上手。

車速錶置於中控台頂層，大大塊錶板都幾易睇。

後排夠位坐足三個人，鍾意MINI，又唔想坐得逼嘅車迷，Countryman一定係首選。

車尾空間夠晒大，標準容量達到350L，收起後排就可擴充至1,170L，禮物再多都放得落。

禮物唔怕多大車廂載得落

作為聖誕老人嘅座駕，有乜嘢重要得過置物量？Countryman正正係MINI旗下車身最大嘅車種，首先前排已經有相當唔錯嘅空間感，就算係有個大肚腩嘅聖誕老人，都可以喺駕駛席坐得舒舒服服；後排方面亦唔失禮，三座位布局依然寬敞，想載多啲禮物嘅話，大可將整個後排收起，就可將車尾置物量由350L大幅增加至1,170L。推薦畀聖誕老人做新拍檔，揀選紅色車身是常識吧，不過對一般平民百姓而言，就冇呢個節日枷鎖，MINI One Countryman就有多達10種顏色選擇，包括Jungle Green、Cosmic Blue與Midnight Grey等，無論係高調或內斂嘅車迷，都可揀到稱心色彩。

1.6L直四夠用又識慳

車身大、負重多，MINI One Countryman又夠唔夠力，陪聖誕老人周圍去？1.6L直四引擎嘅馬力與扭力分別達98hp與15.6kgm，實話實說，當然唔可以好似高性能跑車咁樣風馳電掣，不過根據我哋今次試車所得，坐咗四個人（三男一女，除咗Model姐姐輕磅之餘，其餘三個都有番咁上下體重，粗略估計合共550磅），加埋車尾成堆禮物，起步、加速反應都做到話去就去冇投訴，所以應付日常用車都應該好Easy！至於耗油量方面，平均耗油量僅6.9L/100km，而二氧化碳排放量亦只係159g/km，比起上一代減少5%，符合歐盟六期標準，而且喺NCAP撞擊測試中獲得最高水平嘅五星評級，聖誕老人坐住佢出勤，小朋友都應該好放心。