Sugar S聖誕放閃

聖誕節眨吓眼就到，假如你仲未揀啱禮物送畀女伴的話，都幾大鑊！法國手機品牌Sugar剛剛推出嘅Sugar S就救你一命，要知道十個女仔九個都既貪靚又愛Bling Bling，此機鑲上Swarovski閃石，而且仲有櫻桃粉、玫瑰金等配色，加上5.1mm激薄鋁合金機身好揸手，上上下下都為女士而設，仲唔羨煞旁人？

Sugar S $1,998

包裝盒恍如水晶寶盒，美輪美奐，女士們必定Buy。

右側Power鍵鑲上六顆Swarovski Zirconia人工寶石。

另一邊兩粒音量鍵各鑲上五顆Swarovski Zirconia人工寶石。

採用nanoSIM，卡針更特意設計成巴黎鐵塔造型。

機身只厚5.1mm，非常纖薄。

機背用上強化玻璃，另備有800萬像素鏡頭。

當手機電量不足時，會自動轉至省電模式，只開放電話、短訊等基本功能。

前後置鏡頭都支援美肌模式，可以即時調校滑膚等效果。

內置「一鍵清理」，一按即可清走閒置RAM及程式，保持系統暢順。

寶石上身四代目

Sugar之前出過幾款型號，分別係Sugar、Macaron以及Sugar 2，憑閃石加上女性化設計元素而討得唔少女士喜愛。品牌第四部作品Sugar S機身繼續鑲上Swarovski閃石，不過數量就冇以往咁多，只於機側嘅Power及Volume鍵鑲上16顆共0.21卡嘅Swarovski Zirconia人工寶石。雖然「火數」冇前作咁強，但機身質感就大幅提升，皆因用上航空鋁材製作出一體成形機身，機背則採用Gorilla Glass 3玻璃，手感順滑；最重要是機身僅厚5.1mm，重98g而已，非常輕巧，女士們一雙纖纖玉手好合用！

美人專用拍攝功能

為吸引一眾女性，單靠設計當然唔夠數；拍攝功能亦專為女士而設，備有500萬像素前置鏡頭，除咗提供88度廣角外，亦內置「廣角自拍」功能，可以類似全景拍攝嘅拼貼方式自拍，群拍時幾多人都唔使驚影唔晒！當然唔少得就係美肌模式，前後置鏡頭都支援此功能，用家可以即時調校滑膚、大眼、瘦臉三種效果，試拍過效果都幾明顯！想再突出啲，Sugar S仲設有「美肌」功能供後製相片，執眼袋、祛斑、柔膚等一律有齊，點執都得。至於規格，佢採用Snapdragon 410四核心處理器以及2GB RAM，配合Android 5.0作業系統，整體操作順暢；美中不足係只有16GB容量，亦唔可以加記憶卡，經常下載Apps的話要就住用。