好多人都話英超球員零舍辛苦命，因為冇歇冬期，其實聖誕冇假放嘅，仲有一班NBA球星，好似今年美國時間踏正12月25日正日就有五場賽事，當中包括由Derrick Rose領軍嘅Chicago Bulls，屆時作客Oklahoma City Thunder，佳節檔期都冇假放，照樣打波畀球迷睇，大家當然要落足眼力，而亮點亦不只於球星之間嘅落力演出，仲有各大運動品牌嘅應節新品，當中包括專為Rose喺呢場聖誕大戰而設嘅D Rose 6 Christmas，一於着住佢Frozen The Game，冰封對手任我攞分。

D Rose 6 Christmas $1,299

今代D Rose嘅最大設計特色，就係鞋尾加設Fitframe支撐裝置。

代表芝加哥市嘅六角星，以及附近嘅鞋帶扣，一律換上香檳金配色。

鞋舌正面都換上香檳金配色，貴氣得嚟又有節日Feel。

除咗配色，鞋面上嘅雪花圖案，令D Rose 6 Christmas更有冬日氣氛。

D Rose嘅玫瑰圖案唔只出現喺鞋尾，仲有外底嘅前掌位置。

中底前後掌之間設有Stableframe，用以承托腳弓。

Chicago Bulls Christmas Day Swingman Jersey（Derrick Rose）$699

Portland Trail Blazers Christmas Day Swingman Jersey（Damian Lillard）$699

Washington Wizards Christmas Day Swingman Jersey（John Wall）$699

Golden State Warriors Christmas Day Swingman Jersey（Stephen Curry）$699

Cleveland Cavaliers Christmas Day Swingman Jersey（LeBron James）$699

LA Lakers Christmas Day Swingman Jersey（Kobe Bryant）$699

今年聖誕節波衫最有心思嘅細節位，莫過於設計成蠟印圖章嘅NBA標誌。

新配色涼透心

正如中國人嘅「冬大過年」，聖誕節對外國人而言，亦都更甚於新年，所以每逢聖誕檔期，唔只NBA會方大搞Gimmick，各大運動品牌亦會加推應節特別版嘅新品，當球迷喺屋企坐定定（如果你可以入現場睇波嘅話就更威威）睇波時，平時見慣見熟嘅鞋款當堂變得唔同晒，難免心郁郁又想銀包破戒，例如作為Rose新拍檔，將於Bulls VS Thunder一戰登場嘅D Rose 6 Christmas，更已經提早上架開售，成為各位Rose球迷嘅心水聖誕禮物。講起adidas Basketball嘅聖誕鞋款，傳統嘅紅綠配，出過，甚至詭異Feel嘅紫色以至夜光配色，都出過，今年再度有新意，大玩冰雪Feel。D Rose 6 Christmas嘅配色換上薄荷綠與純白色組合，感覺涼透心，兩色之間仲有雪花特寫圖案，冰極效果更加出面。冬日氣氛滿瀉，節日氣氛又如何？鞋舌正面、鞋尾嘅Rose標誌，以及鞋帶附近代表芝加哥市嘅六角星，統統轉成香檳金色，切合聖誕嘅喜慶氣氛。

Fitframe步步撐

D Rose 6 Christmas唔只係Rose球迷嘅頭號聖誕禮物，亦都係Rose喺25日作客Thunder時嘅貼身拍檔，又點可以有姿勢冇實際？今代Rose繼續以Boost為中底嘅主材料，無論緩震與回彈效果，都係三間牌最新、最強嘅選擇，而且D Rose 6嘅Boost中底覆蓋面積相當大，又相當厚身，令前後掌都可感受到Boost嘅威力。至於D Rose 6最獨特嘅設計，就係鞋尾嘅Fitframe支撐裝置，由六條彈性綁帶連結，連結到鞋領以及中底位置，加埋厚厚嘅鞋領泡棉，索緊鞋帶後，就會將整個裝置連動起嚟，貼腳、舒適之餘，最重要係加強咗對足踝嘅鎖定作用，大大減少拗柴機會，上籃仲有後顧之憂？

同步上架聖誕版波衫

應節嘅唔只D Rose 6 Christmas，但凡有份打聖誕檔期嘅NBA球隊，都會換上聖誕版嘅波衫上陣，今年亦唔例外，喺25日比賽嘅唔只Chicago Bulls，仲有Cleveland Cavaliers、Golden State Warriors及LA Lakers，而26日就到Portland Trail Blazers及Washington Wizards比賽，以上球隊嘅聖誕戰衣，已經在港有售。今年嘅聖誕版波衫唔再係短袖版，用番傳統嘅冇袖設計，配色亦採用各自球隊嘅代表顏色，再襯帶有懷舊Feel嘅米白色。細節方面，波衫號碼印有繡線花紋，而隊名特意用上聖誕卡常見嘅草書體，夠應節未？未算，畫龍點睛之處，係領位背後嘅NBA標誌，設計成蠟印圖章模樣，古人寄聖誕卡，信封口冇免貼膠水邊，要用蠟封嘛！咁斯文又咁貼題嘅聖誕版波衫，能否討你歡心？

查詢︰2368 7318（尖沙咀The One L310號adidas NBA Store）

文︰Dick

攝︰Homan