綠油油過聖誕　錦田Car Camping

今年聖誕，大家諗住點過？又係去酒店食大餐咁例牌？咁啱聖誕正日喺本周五，連埋禮拜六、日，一連三日都係紅假，夠時間玩玩新意思，作為車主一族，不妨搞個Xmas Car Camping都好喎，而且唔使出埠，香港都玩到。事關元朗錦田就有相關營地開張冇耐，設備齊全又新簇簇，連行李都慳番。

內設有機種植區，畀城市人體驗有機種植嘅樂趣。

帳幕夠晒大，叫多幾個Friend嚟一齊玩都仲得。

呢個飛碟營吊於樹與樹之間，置身其中，零舍有凌空Feel。

想喺場內BBQ或煮食都得，想醫肚夠晒彈性。

場內設有多款特色帳幕，除咗飛碟營、蒙古包，仲有草球營。

車身離地距比一般私家車高，方便進出崎嶇路段。

中排空間比後排寬敞得多，Leg-room最有交代。

車廂奉行簡約布局，年輕人或家庭用家都容易接受。

47吋天窗唔只夠晒大，仲有防UV功能。

多達80度嘅後側門開啟角度，進出車廂夠晒方便。

有車冇車都玩得

Car Camping喺外國流行咗好多年，依家香港都玩到，事關本地近年來都開設咗相關營地，唔只提供地方，就連帳幕、爐具甚至食物都提供得到，大家只需帶備個人用品揸車入營，就係咁簡單。好似今次到訪嘅「名樂村」，主打Car Top Camping服務，入場人士只要將車泊喺特設帳幕之下，或者選擇喺車旁紮營（入營時會提供紮營訓練），又或者泊喺場內指定地方，而下榻地方就有吊起於樹與樹之間嘅飛碟營、草球營、蒙古包等特色營帳；冇車嘅朋友都可以到場體驗，只要你有駕駛執照，就可以向園方租車，同樣感受Car Camping嘅樂趣。

同一般Camping相比，Car Camping嘅最大分別，就係參加者可以隨時揸車到附近嘅地方觀光，享受自駕遊車河嘅樂趣，就以名樂村為例，濕地公園與米埔濕地都係至近選擇。唔想出Camp嘅話，場內佔地甚廣，亦有大把嘢玩，包括有機種植與果醬DIY活動等，若果約埋幾家人齊齊入Camp，仲可以團體形式參加攀樹屋及過索橋等歷奇訓練。

X-Trail勝在生得高

今次同行嘅日產（Nissan）X-Trail，定位為城市SUV，強調空間與實用，雖然前驅設定（FF）並非越野首選，但係離地距高於一般私家車，通過積水地帶與崎嶇路面都有一定優勢，加上配備厚身輪胎（225/65 R17），行駛碎石路或剷上路壆都唔使擔心刮花車身。就以今次錦田之行為例，入村前要經過一段村路，又要輾過碎石路先去到營地，X-Trail都應付自如，而且主動式乘坐穩定系統（ARC）通過制動或引擎扭力控制，減少車身嘅搖擺幅度，即使路面不平都可以坐得穩陣。今次試車，我哋收起後排，再將中排移到最後，Leg-room當堂長達660mm；如果變番七座位布局，長腿女Model就表示後排空間有啲窄，唔太適合高個子乘客。

性能方面，X-Trail嘅2.0L引擎導入Twin VTC技術，可以因應車速而改變進排氣時間，既有144ps馬力及20.4kgm扭力輸出，而且配合電子智能無段變速（XTRONIC CVT）波箱，慳油能力相當高，扣除Car Camping嘅日子，筆者另外試咗四日車，行咗超過300km，而平均耗油量只有13.5km/L，油費唔到$1.1/km，絕對有交代。另一抵讚係電動尾門用咗感應式設計，即使雙手都拎滿行李，只要喺尾門感應器附近擺動手部或者物件，尾門就會自動打開，就連模特兒都話夠方便。