HTC Desire 728 Dual SIM 筍玩靚聲

今年HTC頻頻出機，主要係力谷One旗艦系列，對於預算唔多嘅用家，換機門檻高咗啲。有見及此，HTC終於整番部中階手機新作Desire 728 Dual SIM，有齊八核心處理器、1,300萬像素主鏡頭等實用功能，最正係配備BoomSound雙前置喇叭，配合5.5吋大芒，睇片、聽歌都有靚聲相伴。

HTC Desire 728 Dual SIM有炭灰和白色兩款選擇。
各$2,398

備有5.5吋屏幕，不過解像度只有720p。

機背加入防污塗層，減低沾上指紋的機會。

機身厚7.87mm，重量為153g，唔算累贅。

支援雙卡雙待，並能兼容最大2TB的microSD卡。

預載了Android 5.1作業系統及HTC Sense 7.0介面，操作順暢。

備有「雙網絡管理員」，可以自訂SIM卡名稱及網絡模式。

可以調校屏幕色溫，鍾意冷暖色調任君選擇。

採用中階八核心處理器，跑分未見突出，但上網、睇片都總算應付自如。

內置大量主題，唔怕介面沉悶。

前置鏡頭支援美肌功能，效果明顯。

寶石金One A9用上金色機面，甚有日系感覺。而全金色機背亦唔會太俗氣，外觀都幾搶眼。

雙前置喇叭出色

一如大部分HTC手機，Desire 728 Dual SIM沿用一體成型機身，機背加入防污塗層，可以減少沾上指紋等污漬，而機面就改用全玻璃設計，令手感不致太膠，拎上手質感尚算合格。新機配備5.5吋屏幕，雖然色彩、亮度效果皆不俗，但解像度就只有1,280×720，論細緻度就比較輸蝕。幸好尚有聲效加分，備有HTC BoomSound雙前置喇叭，而且內置Dolby Audio音效技術，音量輸出以至環迴效果都非常突出，用嚟睇YouTube、聽串流音樂都有唔錯體驗，贏盡同級機。

出眾網絡兼容力

規格方面，Desire 728 Dual SIM搭載MediaTek 6753八核心處理器，時脈最高為1.3GHz，配合2GB RAM及16GB ROM，效能中規中矩。值得一提反而係網絡兼容度，皆因此機支援雙卡雙待功能之餘，仲兼容TD-LTE、FDD-LTE、TD-SCDMA、WCDMA、GSM制式，基本上游走全球都絕無問題。至於攝力上，前後置鏡頭分別達500萬像素及1,300萬像素，前鏡頭更備有即時美顏、人臉融合等功能，玩味十足。