身為Air Jordan的粉絲，試問又有邊個月得閒過？嚟到12月，只怕大家會更加瘋狂，事關最受歡迎嘅AJ XI，自2009年起例必喺聖誕檔期推出重點復刻，今年就有AJ XI "72-10"，向Michael Jordan、Chicago Bulls以至整個NBA最黃金嘅時代—1995-96年度嘅球季致敬，AJ XI "72-10"就作出種種華麗改變，襯番當年嘅光輝歲月。

AJ XI 72-10 $1,599

鞋尾改用麖皮之餘，「23」以及Jumpman Logo都用咗有別OG嘅處理手法。

鞋身中段以真皮代表尼龍，講究程度大幅提升。

鞋頭並非普通嘅漆皮，而係喺真皮表面加上透光度高嘅薄膜塗層，亮麗之餘又有透明化效果。

今次嘅外底用咗半透明奶白色設計，希望唔似全透明咁易變黃啦！

鞋面用料大升級

講明先，AJ XI "72-10"絕非一般嘅復刻，反而好多方面都同OG版本有出入，「還原度」比唔上其他嘅Retro版本，但正正因為多項有別原著嘅改動，先至切合到"72-10"嘅主題，亦成為芸芸AJ XI版本之中最有貴氣嘅選擇。先嚟前文提要，話說1995至96球季，Chicago Bulls喺MJ嘅帶領下贏到總冠軍之餘，仲得到72勝10負嘅成績，唔只係球隊史上，亦係NBA成立以來最佳成績。

以往AJ XI都喺聖誕檔期推出，但今次AJ XI "72-10"就提早喺本周開售，不過最大改動還屬鞋身用料，首先鞋身中段嘅尼龍改由真皮取代，由外觀到質感當堂Grand晒，亦都比尼龍多咗真皮味道，鞋癡一定受落。鞋尾方面亦有所升級，改用麖皮製作之餘，以往純粹貼上去嘅「23」字樣，"72-10"改用刺繡製成，仲有側面嘅Jumpman Logo，就由刺繡變成金屬紅電鍍款式。至於AJ XI最為世人稱頌嘅漆皮鞋頭，"72-10"就有大幅度升級，就係喺真皮表面加上一層透光度高嘅薄膜，效果好似車身做咗水晶蠟，特別令立立，仲將底層嘅真皮紋理清晰Show埋出嚟，講究程度冇得輸，若然揩花少少嘅話，相信鞋癡一定會心如刀割，故此，咁特別、咁華麗嘅AJ XI，若然有幸得到嘅話，睇怕都係收藏為上、少着為妙。

即日上網登記

試問塵世間，有邊對AJ唔使抽？何況係AJ XI？AJ XI "72-10"都唔例外，各位AJ控要留意，nikestore.com.hk於今、明兩日就會接受帳戶會員網上登記，隨後就以抽籤形式決定花落誰家，至於正式上架日期係本月12日，詳情要到網站瀏覽，都係嗰句︰祝君好運啦！

文︰Dick　攝︰Homan

登記網址︰www.nikestore.com.hk