喺「剔牌」嘅四大波Boot系列中，Tiempo嘅矚目程度似乎唔夠其他三位師弟，或者因為Tiempo嘅星級用家，多數都係中、後場，偏重防守型嘅球員關係，入鏡頻率難免唔及一眾前鋒咁高。其實低調唔代表冇實力，試想想，如果Tiempo冇過人之處，又點會屹立球壇21年，成為Nike Football資歷最深嘅台柱，直到今日依然推陳出新，備受力捧？而且再細心數數，Tiempo嘅攻擊型球星比比皆是，細哨、迪維斯、派路、賓迪基，仲有傑志嘅佐迪，都係Tiempo嘅知音。

Nike Tiempo Legend 6
$1,499

鞋面加上ACC（All Conditions Control）技術處理，無論晴天雨天，都可保持清晰球感。

鞋頭最大限度地減少縫線，加上真空製作方式，令皮面緊貼底下嘅網形框架，因而浮現出凹凸紋理，一定程度上增加與足球表面嘅摩擦效果。

Tiempo Legend 6標榜以袋鼠皮製作鞋面，故此有呢個代表真皮製造嘅盾形標記作為身份象徵。

為咗凸顯鞋領內側高過外側嘅設計特色，內側加咗Swoosh商標以作識別。

一路走來，由第一代到依家嘅Tiempo Legend 6，都堅持低筒鞋領加真皮鞋面兩項傳統。

前後鞋釘分別用咗圓形與方形設計，前者有利轉向，後者可以加強抓地力，分工清晰。

鞋櫳嘅網形框架既可支撐皮面，仲有鎖定腳掌嘅作用。

着住Tiempo Legend 6嘅佐迪，無論剔波、扣波或者射波都頭頭是道，似乎同新拍檔一拍即合。

Tiempo真係一款好有性格嘅波Boot，當同門三位師弟—Mercurial、Magista與Hypervenom都變身高筒版之際，最新一代嘅Tiempo Legend 6依然保持低筒傳統；除此之外，唔只Mercurial、Magista與Hypervenom，當市面上大部分波Boot都採用合成物料之際，Tiempo一路走來都係真皮波Boot嘅表表者，Tiempo Legend 6仲用咗最頂級嘅袋鼠皮做鞋面材料，正正因為大「皮」氣，先至令Tiempo咁多年嚟成為好波之人嘅首選。

縫線愈少 球感愈高

今時今日嘅波Boot五花八門，有啲Sell輕、有啲標榜靈活性、又有啲斬波可以落重篩……其實反璞歸真、大巧不工，球感先係王道！無論設計再刁鑽、花巧都好，假如鞋面做唔到橋樑嘅角色，將球感好好傳遞到腳掌，控傳射都會打折扣，只會得物無所用；即使依家嘅合成物料已經有好大進步，做到又輕又薄又夠堅韌，但係論柔軟度與貼腳度，即係傳遞球感嘅兩大關鍵，袋鼠皮依然係最佳選擇。

Tiempo Legend 6唔只用袋鼠皮製作鞋面，仲引入唔少革新設計，將球感更臻極致。傳統嘅真皮波Boot，為免皮面使用日久而變形走位，往往會喺鞋頭位置加上大量縫線作定位之用；Tiempo 6捨棄舊方法，鞋身中間係一層網形框架，利用真空抽氣方式，將底層嘅泡棉內裡與外層嘅袋鼠皮結合起嚟，只係喺有必要嘅地方略加縫線定位，從而得出一片近乎無縫嘅真皮鞋面，令整個前掌區都可傳達實在嘅球感，Nike足球設計師Vianney de Montgolfier仲道出另一好處︰「唔用縫合式鞋面，可以降低泥土、水分從縫線位滲入鞋面嘅機會，避免皮革硬化。」

全方位跑動 依然貼腳

Tiempo Legend 6嘅另一新設計，就係Built-in Traction System，據品牌資料解畫，就係利用微纖維製成嘅鞋墊，與鞋底內部嘅矽膠互相產生牽引作用，從而做到「鞋底牽引鞋墊、鞋墊牽引襪子」嘅效果，老實講，文字上嘅解釋真係好玄，不如實際試着見真章，筆者就着過Tiempo Legend 6嚟練波，感覺的確好可靠、好實在，例如每次起步時，唔會有鞋底貼唔實腳掌嘅情況出現，至於左右轉向、橫移，鞋櫳依然貼腳，唔會出現過多空位令腳掌過度移位。除此之外，為免阻礙足踝活動，唔少籃球鞋嘅鞋領，都會採用內側高、外側低嘅設計，Tiempo Legend 6亦都跟風，故此喺內側加咗Swoosh以作標記。

佐迪新拍檔

Tiempo標榜球感，而無論前中後三線球員，對球感嘅要求都係多多益善，尤其是攻擊型、創造型球員，球感愈好，就可以做出愈多變化，難怪Montgolfier有意為Tiempo洗底，強調着住Tiempo Legend 6嘅球員︰「都係進攻嘅發起人。」早前Nike HK就邀請咗傑志嘅前鋒佐迪現身說法，證明Tiempo同前鋒都可以好啱Key！喺筆者睇本地波嘅印象中，佐迪着過CTR360、Mercurial及Hypervenom等鞋款，近年轉用Tiempo Legend 5，依家改用新Tiempo拍檔又有何評價，他說︰「Tiempo Legend 6嘅皮面真係好柔軟、貼腳，依家我每日着住佢嚟練波，都覺得好舒服。至於全新嘅無縫真皮鞋面，的確可以提升球感，當球員需要作出難度較高嘅傳波、射門，呢種實在嘅球感就可以增加出腳嘅信心。我認為新Tiempo唔只適合前鋒，中場、後衞都同樣啱用，因為佢哋好多時都會發動進攻。」

文︰Dick

攝︰Man

銷售點︰旺角花園街66-68號Nike Football

查詢︰2388 3348