有得揀！冧歎聖誕餐

如果你正為着自己將要過一個「孤獨聖誕」而憂傷，請先不要太過傷感，事關為聖誕而發愁的，絕非只得單身人士。以小弟為例，年年都為帶女朋友去邊度食聖誕大餐而煩惱，不過累積多年（捱罵）經驗後，今年我終於有備而戰，預先精選4間具特色的餐廳，有吉蒂貓伴食的、有新開不久的、有無敵海景的，也有氣氛浪漫的，斷估點都有一間啱佢心水啩！

美食當前，還有你心愛的小公主，這種童話式聖誕餐哪裏找啊？

南瓜忌廉湯
南瓜正值當造期，煮成濃滑忌廉湯，帶來啖啖暖意，配上可愛的Hello Kitty蜜糖多士，夠晒Sweet！

烤美國肉眼排
Hello Kitty頭像木盤放有肉汁豐饒、肉味香濃的美國肉眼排，配以薯蓉、西蘭花、蘋果粒和紅菜頭砌成的Hello Kitty聖誕樹，心思十足。

香煎鱸魚
聖誕餐另一款主菜，鱸魚以紅菜頭汁、青豆汁和粟米粒點綴出紅、綠、黃的繽紛色彩，味道清鮮，最啱女士品嘗。

迷你焗雪山
因應冬季推出的焗雪山，內裏是海綿蛋糕和朱古力雪糕，綴以搶眼番石榴，令人想起聖誕節的搶眼燈飾。

拉開布幕，即見精緻裝潢，感覺像個秘密花園般，浪漫滿瀉。

鵝肝威靈頓牛排
聖誕晚餐主菜之一，澳洲黑安格斯牛腰肉裹着鵝肝，鋪上一層用拔蘭地煮過的碎蘑菇粒後，以法式麵糰包裹後烤製，配搭西芹根、紅蘿蔔和砵酒汁品嘗，圖為6 Sets晚餐分量，一班人share食，夠晒豐盛。

蔓越莓火雞肉卷
聖誕晚餐的主菜之一，將火雞腿磨碎後與乾果、香料、栗子及忌廉混合，再以火雞胸肉包裹，最後捲上火雞皮慢烤，配紅莓醬和火雞汁吃，味道富層次。

朱古力栗子聖誕樹頭蛋糕
以混有橙味果醬的榛子醬和朱古力海綿蛋糕製成的傳統聖誕蛋糕，賣相精緻，味道亦不賴。

檸檬草慢燉比目魚
聖誕晚餐的前菜，比目魚加上檸檬草油以青檸生薑清湯慢燉而成，配以生薑、檸檬草、芫荽、青檸汁與青檸絲，酸香開胃。

餐廳二樓是Mr Fox，所供應的套餐分量十足，最適合一班人聚會。

望住大海享受美味鮮活，是不少情侶嚮往的浪漫劇情。

酸汁醃紅鯛魚
以秘魯酸汁（Ceviche）醃製的鯛魚肉，上面放上一卷卷酸醃菜，澆少量麻油，入口酸香開胃，不失鮮味。

線釣多寶魚
多寶魚配搭以不同形態出現的椰菜花，有烤煮過的、有打成蓉的，亦有如雪花般散落的，貼合聖誕節冬日感覺。

慢煮帝王三文魚
切成小段的慢煮三文魚，配上魚子醬、小茴香籽、醃檸檬和鮮忌廉，擺盤精美，充滿海洋氣息。

熱情果配椰子泡沫
口感過癮豐富，底層有酸甜的熱情果脆脆，上面放上幼滑泡沫和蛋白脆餅，為整頓晚餐晝上甜美句號。

餐廳坐擁淺水灣海灣休閒景致，湛藍色調帶出自然簡約的海洋概念，優雅得來不失貴氣。

香烤羊排伴薯蓉及菠菜
聖誕餐主菜之一，以澳洲羊扒配合特製惹味醬汁和新鮮迷迭香和菠菜，帶出羊扒羶香。

火雞胸肉配栗子醬
主廚特別為聖誕餐創作的火雞菜式，火雞胸肉以海鹽和檸檬汁等醃味後，配以栗子和南瓜，每一口都是最時令的鮮味。

無花果沙律伴山羊芝士
前菜選擇之一，無花果味道酸甜又富營養，配合味道較輕盈的山羊芝士，適合愛健康的女士品嘗。

香蒜烤澳洲黑安格斯肉眼扒配薯條
用上足250克的澳洲黑安格斯肉眼扒，上面放上混有芫荽的牛油，入口更Juicy，配以即炸香脆薯條，男士最愛。

餐廳地方不大，約可容納24人，布置清新，洋溢法式浪漫情懷。

Hello Kitty Secret Garden 2.0　童真女生最愛

有時有啲嘢係冇得解！就好似男生們唔明點解女生們咁愛吉蒂貓，總之就係愛喎！所以我諗聖誕節如果有吉蒂貓陪食大餐，女朋友一定驚喜萬分。位於大坑的Hello Kitty主題餐廳最近就延伸開設Hello Kitty Secret Garden 2.0，印有吉蒂頭像的絨質椅子、蝴蝶結花飾等，打造出如公主專屬的用餐區，在此用膳猶像置身秘密花園，感覺浪漫。食物方面，餐廳特別設計了4道菜聖誕大餐，每道菜都有可愛的吉蒂元素，兩款二擇其一的主菜─香煎鱸魚和烤美國肉眼排更伴有精緻小聖誕樹，由薯蓉、西蘭花、紅菜頭等組成，盡見心思。

Hello Kitty聖誕餐

價錢：$398/位（4道菜）

供應日期：12月18日及27日

Shop Info

Hello Kitty Secret Garden 2.0

地址：大坑新村街30號地下

電話：2808 2868

Mr & Mrs Fox 二人同享大餐

聖誕節，沒甚麼比大吃一頓來得滿足，若然你有個愛吃的另一半，推介你到鰂魚涌新開的Mr & Mrs Fox慶祝。位於餐廳二樓的Mr Fox推出兩位起的5道菜聖誕晚餐，分量十足！以一道鵝肝威靈頓牛排為例，約齊一大班朋友叫6 Sets(12人分量)的話，Size比欖球還要大！內裏更釀滿鵝肝釀，吃得矜貴，仲夠晒Sweet！

聖誕晚餐

價錢：$685/位（5道菜）

供應日期：12月24日及25日

Shop Info

Mr & Mrs Fox

地址：鰂魚涌糖廠街23號

電話：2697 8500

The Ocean 無敵海景伴食

顧家當然好，不過適當的二人時光亦是一段關係中的重要養分！大時大節帶她到淺水灣The Pulse新開業的海邊餐廳The Ocean，雙雙望着醉人海景舉杯同飲，諗吓都覺得冧！餐廳以海洋為設計靈感，佔地也如汪洋般大，逾萬平方呎的地方，特設觀海座位，私密度甚高。餐廳主打國際化的海鮮佳餚，而聖誕餐中，特別推介一道線釣多寶魚，肉質爽滑，更有椰菜花的各種形態，包括香烤、菜蓉和似是飄落而至的雪花，設計細膩富心思。

聖誕晚餐

價錢：$888/位（7道菜）

供應日期：12月24日

Shop Info

The Ocean

地址：淺水灣海灘道28號The Pulse 3樓303-304號舖

電話：2889 5939

Yours Bistro 抵食隱世法菜

聖誕節造就不少戀情萌芽，皆因在節日氣氛影響下，令人變得容易動心。今年想和心儀的她食大餐慶祝，情調浪漫的法國菜就最適合不過。不過，並非人人負擔得起高昂的消費，推介隱身於佐敦舊區的法國餐廳Yours Bistro，其4道菜法式聖誕大餐，每位收費$328，收費相宜，最啱跟「友達以上、戀人未滿」的「好友」同享。當中的火雞胸肉配栗子醬，用火雞、栗子、南瓜蓉三種食材帶出濃厚聖誕特色，加上肉嫩火雞胸，點題又滋味。還有用上無花果和紅菜頭炮製的沙律，營養價值豐富，On Diet女生一定Like，見你咁識揀，肯定加分喇！