想搵個肯陪你食老麥嘅女朋友/老婆，難；想搵個肯陪你睇波嘅女朋友/老婆，仲難？早前網上討論區就有潮文，事主炮轟老公「黐咗線」，投訴佢掛住買利物浦波衫、紅軍輸波會喊晒口、贏波就開支酒慶祝，「帶佢出去見自己D朋友，人地老公講車講樓，佢就自己好興趣話利物浦今年點點點」，仲以「好核突」嚟形容自己老公嘅喜好，睇嚟喺呢位女士眼中，男人鍾意足球，仲十惡不赦過去滾！不過凡事總有例外啩，如果你係意大利嘅球迷，相信要搵個志同道合嘅女朋友甚至老婆，難度應該低好多。

PUMA意大利主場球衣（球迷版）
$599（另有ACTV落場版售$1,599）

就連隊徽設計都型格過人，單憑美學呢一招，意大利已經深得民心。

領口印上意大利文「Tradizione」，意思是「傳統」，而「Forza Azzurri」可解作象徵意大利的「藍色力量」，至於左上角嘅四粒星，緣於意大利贏過四次世界盃。

設計團隊就連衫腳都唔放過，縫上三角形嘅意大利國旗，留意衫身正背面仲用咗前短後長嘅剪裁。

PUMA意大利練習球衣$399/件

PUMA意大利國家隊風褸 $599

意大利屈機新衫

意大利零舍有女觀眾緣，唔到你唔認，主要原因之一就係靚仔特別多，以前有巴治奧、迪比亞路、托迪，依家有達米安、馬高華拉堤及加斯安奴柏利，個個都Model咁款，加埋意大利件波衫，同其他球隊嘅波衫相比，歷代以嚟總係多咗一份Fashion Sense，特別容易過到女球迷嗰關，型男加Fashion，邊有得輸？只能怪時尚之國實在太過得天獨厚吧！

早前意大利又再出招博Like了，就趁國際賽檔期，發表咗全新嘅意大利波衫，主場嘅全藍色傳統當然冇得改，延續球隊嘅優雅、浪漫形象，而衫身正背面都有直間暗花點綴，比起上一款嘅淨色設計，更見精巧。除此之外，原本摺領、開胸嘅領口剪裁，今次改為高圓領，後者係參考以往意大利波衫，例如60、70年代嘅款式而成，而每邊衫袖都有一對金線點綴，衫腳又縫上三角形嘅意大利國旗，細節位特別多，心思十足。其實唔只領位，新波衫嘅袖口都用咗偏高剪裁，自問身形Fit、練成麒麟臂嘅球迷，正好着嚟Show Off。

特製風褸冇蝦碌

除咗主場波衫，同屬新系列嘅練習波衫與風褸亦都同步上架，前者就同主客波衫一樣，都有藍白兩色之分，不過練習波衫所用嘅藍色偏深一啲，與主場波衫做出明顯分別。筆者嘅心水推介係球隊風褸，唔只因為天氣真係涼咗，啱晒時機外，拉鏈扣又有特製膠環，拉上拉落都分外方便，呢項小Gimmick真係要多謝雲加，事關去年阿仙奴改投PUMA陣營，鑑於以前雲加經常有拉鏈蝦碌嘅場面畀人拍到，PUMA就專登喺阿仙奴嘅風褸拉鏈加上呢項小設計，唔再畀「教授」出洋相，之後呢項實用設計仲推廣到旗下其他產品之上。

查詢︰2834 3821（銅鑼灣SOGO四樓PUMA Store）

2332 7288（大埔超級城二樓B區PUMA Store）

文︰Dick　攝︰Paul