想當年，「唧唧復唧唧，木蘭當戶織」，估唔到1,500多年後嘅今日，各大運動用品牌子亦都木蘭上身，個個織到冇停手？事關近年嚟波鞋界流行Less is More嘅設計哲學，而織物結構嘅鞋面，正好兼備輕量化、透氣與貼腳等多重優點，難怪各大品牌都相繼開發出自家嘅織物鞋款，彰顯自家技術嘅領先地位，最新代表就有PUMA IGNITE ProKnit。

IGNITE ProKnit　$1,499/對

外底嘅主要觸地位置加上黑色嘅EverTrack物料，做到耐磨與抓地並重。

中底沿用全掌式IGNITE，係PUMA嘅新一代泡棉材料，兼具緩震與回彈能力。

鞋身唔同位置嘅織物密度都有不同，例如鞋頭就有高度延伸性，方便腳趾活動。

鞋領整合咗襪套設計，加強對足踝嘅貼腳程度。

所有IGNITE ProKnit都標榜係歐洲製造，係唔係當堂信心大增呢！

無分日夜　貼腳自在

提起織物鞋面，或者你會聯想到白飯魚，有幾特別喎？如果係咁普通嘅話，各大品牌就唔使三年又三年喺呢方面做研發啦！多得電腦技術協助，依家波鞋界所用嘅織物結構，當然唔係一塊布咁簡單，就以IGNITE ProKnit嘅鞋面為例，雖然係無縫一幅過嘅織物，但係喺唔同位置上，可以織出唔同嘅密度與彈性，例如鞋頭位置有更大嘅延伸性，令腳趾有足夠嘅活動空間，反之鞋尾就會硬身一啲，為腳踭提供充足嘅支撐效果。除此之外，其實腳形大小會隨住時間而變，例如往往運動過後，血氣行順咗，腳掌自然會大咗少少（所以好多人話過咗晏晝度腳試鞋會準啲），IGNITE ProKnit嘅彈性鞋面，無論日夜都可做到舒適、貼腳，而且與傳統嘅拼貼性鞋身製作方法相比，織物鞋面唔只顯得薄身、輕巧，加上鞋身係以纖維製成，自然比真皮或人造物料透氣得多，有咁多好處，織物跑鞋近年大熱起嚟，其實好合理。

自家新招　連身襪套

雖然喺織物鞋面嘅研發上，PUMA唔算係最先嗰個，但係有心唔怕遲，何況多咗新招數加持。與同類產品相比，IGNITE ProKnit最特別嘅地方，就係鞋領襪套式設計，加上所用嘅紗線彈性相當高，消除咗其他同類產品鞋領位置偏薄、貼腳度不足嘅問題，着上腳更加舒服、可靠。另一方面，顧名思義係IGNITE系列嘅最新版本，IGNITE ProKnit沿用IGNITE全掌式中底物料，加上鞋踭內藏ForEverFoam，帶嚟出色嘅緩震與回彈作用，提升日常嘅練跑效果。

文︰Dick　攝︰Homan

查詢︰2377 1775（尖沙咀海港城港威商場2樓2605-2606號PUMA Store）、2246 9382（九龍塘達之路又一城商場L1-06號PUMA Store）